La probabilitad per Nadal alv da quest onn è actualmain tar 30%. En tscherts lieus pudessi bain tanscher per ina vetta naiv nova. Or dal grond um da naiv na vegni dentant probablamain nagut en la Bassa. Il meteorolog da SRF Jürg Zogg sa en tge regiuns che pudessan crudar singuls flocs da naiv e sch'i funcziuna cun vacanzas da skis tranter Nadal e Bumaun.
Jürg Zogg
Meteorolog SRF
En tge regiuns pudessi naiver sur Nadal?
En il nord da las Alps datti sulettamain la mesemna, la Nadalnotg, in pau precipitaziuns. L'emprim poi sa pluschignar per part or dals nivels da tschajera auta, pli tard datti in pèr flocs da naiv. La pli gronda tendenza da precipitaziuns è en las Prealps, en la Svizra dal Nordvest e la saira en il Giura. Localmain tanschi pia per in pau atmosfera d'enviern, ma betg dapertut. E quantitativ èsi tuttina mo pauc: i tanscha strusch per in um da naiv, plitost mo per vias e trottuars glischas. Tras la bisa ferma fin burascusa vegn la pauca naiv suflada enturn ed i sa senta fraid murdent.
Auter en il sid da las Alps: La mesemna suentermezdi e la notg da Nadal datti temporarmain plievgia, il cunfin da naiv sa sbassa sin 1000 fin 500 meters. Dal territori dal Simplon sur il Tessin fin en il Mesauc e la Bregaglia datti tranter 10 e localmain 20 centimeters naiv nova en regiuns pli autas.
Vegn la naiv la fin d'emna e vers la fin da l'onn?
En il nord vegni gia da Nadal puspè sitg. En la Bassa e las Prealps sa mantegnan anc restanzas da tschajera auta, en las Alps vegni sulegliv. Il di da Son Steffan e la fin d'emna datti en las Alps aura perfetga per far sport d'enviern cun bler sulegl, en la Bassa èsi per part sulegliv, per part tschajerus. Er suenter quintan ils blers models d'aura cun pauca naiv fin la fin da l'onn.
Co statti cun la naiv en las muntognas? Pudain nus ir cun skis?
Tut tenor exposiziun e la regiun è quai in zic different. Da princip sa chatta sut circa 1500 meters mo pauca fin insumma nagina naiv. Ma er pli ensi è l'autezza da la naiv sut la media da plirs onns. Sch'ins po ir bain cun skis u betg n'è dentant betg mo ina dumonda da la naiv natirala.
En territoris da skis che han ina ennavaziun artifiziala per quasi l'entir territori pon las relaziuns da pista esser bunas malgrà la mancanza da naiv.
Quant savens èn dis da festa alvs, or da vista statistica?
Statisticamain è Nadal alv rar en la Bassa. A Berna, sin circa 550 meters sur mar, hai en la media da plirs onns circa mintga quatter onns naiv durant almain in dals dis da Nadal (24, 25 u 26 da december).
En tge regiuns datti mintgamai la pli blera naiv ils dis da Nadal?
Pli aut e pli probabel ch'igl è Nadal alv. Sin 1600 meters autezza sco per exempel a Tavau èn Nadal mo darar verd. En la seria da mesiraziuns dapi il 1931 ha l'Uffizi federal da meteorologia e climatologia registrà mo ina giada ils 24 da december nagina naiv – l'onn 2016.