Arosa/Lai ha in pretsch maximal
Il territori da skis Arosa/Lai fa per la 9avla stagiun diever dal sistem cun ils pretschs dinamics. Tar els dettia mintga di in contingent da bigliets ed in pretsch maximal che na vegn betg surpassà. Durant la stagiun auta saja quest pretsch maximal tar 90 francs per ina carta dal di, ha il responsabel per la vendita da bigliets, Christian Wyrsch, ditg envers il schurnal regiunal da SRF.
Actualmain hajan els gia vendì bigliets en valur da passa 2 milliuns francs. Cunquai che la glieud cumpra ils bigliets ordavant, profiteschia il territori da skis gia pli baud da quests raps. Cunzunt la stad dettia da far bleras investiziuns e grazia a quella prevendita possian els gia pajar ils quints gronds. Quai saja in avantag dal sistem cun ils pretschs dinamics.
Engiadin’Ota desista d'in pretsch maximal
L’Engiadin’Ota va en la 8avla stagiun cun il sistem dals pretschs dinamics. Tenor Markus Meili, il CEO da l'Engadin St. Moritz Mountains SA e suprastant da las pendicularas Engiadin’Ota, possian quests pretschs dinamics manar in zic las decisiuns dals giasts. Sis da diesch giasts na giaian numnadamain betg sin la muntogna en questa regiun, cunquai che la purschida en las vischnancas è er avant maun.
Tar els na dettia nagin pretsch maximal – tgi che cumpra baud il bigliet, profiteschia dal rabat. D'in di cun bunas cundiziuns pudess in bigliet custar fin 120 francs. Ils pretschs dinamics mainan tar quai, che la glieud sa reparta scumparta in zic. Pervi dal pretsch èn las pistas da dis da bellezza forsa betg memia plainas e dad in di cun naiv hai tuttina intgins giasts perquai ch’els han gia cumprà il bigliet per quest di.
In sistem betg transparent
Sara Stalder, da la protecziun per consuments, n'è betg d’accord cun quests pretschs dinamics – surtut betg sch'i dat nagin cunfin envers si, quai na saja betg transparent.
Tenor Sara Stalder dat quest sistem la pussaivladad als territoris da skis d'auzar ils pretschs senza ch'ils clients sentan quai directamain. Ella pretenda, ch’ils territoris da skis duain puspè turnar tar il sistem cun pretschs fixs, per ch'i saja cler quant ch’ins paja per ina charta dal di u ina da l’emna.
Questa critica na chapescha Markus Meili, il CEO da l'Engadin St. Moritz Mountains SA, betg. Tar hotels u auters lieus na sappian ins era betg tge ch’è il pretsch il pli aut. Els hajan percunter ina communicaziun transparenta, cunquai ch’ils giasts possian mintga mument ir tar la cassa e guardar quant ch’in bigliet custa. Il sistem dal pretsch fix saja stà la realitad ils ultims 100 onns, la glieud era disada da quai. Ussa haja il sistem midà e saja anc adina transparent.