Ir cun skis, scarsolar u giudair las loipas: quai è grev senza naiv. Giavischà fiss franc naiv natirala. Tuttina fissan blers territoris da skis er gia cuntents da pudair far naiv artifiziala. Cun quellas temperaturas miaivlas che regian il mument? Difficil.
Ina sfida cunzunt per territoris pitschens ch'èn enturn 1'500 meter sur mar, sco per exempel Veulden en la Tumleastga.
Veulden: Territoris pitschens sa chattan bass han pli grev
A partir da quest onn hajan els perfin in nov chanun da naiv che duess producir naiv artifiziala giu en il vitg sper la pista d’uffants, quai declera Roman Bernard, mainafatschenta da las pendicularas da Veulden.
Cun noss nov chanun da naiv pudain nus nov far naiv gia a partir da –2 enstagl da –6 grads celsius. Ma, igl è anc adina memia chaud.
Il territori da skis a Veulden porscha mo pistas da naiv natirala, insatge auter na pudessan els betg supportar, uschia Roman Bernard. Perquai stoppian els ussa avair pazienza e sperar che quella vegnia. In plan B na dettia betg.
Sche l’aura resta uschia lura stuain nus guardar da preparar las vias per ils peduns – che almain quels possian giudair la natira.
Schizunt il glatsch da patinar è il mument serrà. I saja simplamain memia chaud, uschia Roman Bernard. E tuttina sperian els fitg che l’aura sa midia bain prest.
Scuol: Ina situaziun pauc legraivla
Era en Engiadina Bassa spetgan ins fervent sin naiv nova, sco Andri Poo, manader da las pendicularas da Scuol tradescha. I na saja betg ina situaziun fitg legraivla. Els hajan relativamain pauca naiv natirala. Vitiers vegnian las temperaturas autas, uschia ch'i saja stà difficil da far naiv artifiziala las davosas trais emnas. Era han els patì dad in fenomen meteorologic nua ch'igl è sura sin ils pizs pli chaud che en las valladas. Ina situaziun ch'i dettia anc magari a Scuol. Betg optimal per far naiv artifiziala, accentuescha Andri Poo.
In plan B na datti betg. Fatg è che nus vulain savair avrir las pistas giu en las valladas per pudair distgargiar la sutgera e la pendiculara.
Breil: Actualmain na fan els betg quitads
Sper temperaturas fraidas dovri per far naiv artifiziala natiralmain er ina massa resursas dad aua. Tut tenor chanun da neiv poi esser fin dus liters aua per secunda, sco ina retschertga da SRF mussa. Aua per producir naiv artifiziala haja tenor Sandra Brügger dal territori da skis da Breil, che sa chatta tranter 1’300 e 2’500 meters sur mar, anc avunda. Quella vegn il mument duvrada per las pistas suren. Las pistas en las valladas stoppian actualmain desister da naiv artifiziala ord motivs da resursas dad aua.
Anc n'essan nus betg gnervus quai che pertutga la mancanza da naiv.
Anc paran ils da Breil tut lucs – propi gnervus vegnian els lura pir l'entschatta schaner, sche nagut sa midia vi da la situaziun, sco Sandra Brügger tradescha.
Corvatsch: Qua è «il mund» en urden
Pistas fin giu en la vallada datti en il territori da skis Corvatsch en l’Engiadin'Ota. I saja stà fraid avunda per far naiv artifiziala, sco Nicolà Michael da las pendicularas Corvatsch tradescha.
In grond avantatg saja ch’il territori da skis è tranter 1'800 e passa 3’000 meters sur mar.
Il mund è anc en urden. Tuttina manca la naiv natirala e nus sperain fitg che quella vegn prest – almain per ch'i guarda ora in zic pli bel sur Nadal e Silvester.
Resumà pon ins dir: temperaturas fraidas e naiv nova stattan era quest onn il pli sisum la glista da giavischs tar blers territoris da skis.