Stan a Mustér
Il territori da skis a Mustér saja per gronda part pront per la stagiun d'enviern, di il manader da las pendicularas Stefan Arnold.
Nus avain realisà las preparativas, ussa essan be pli vi da finalisar.
Per exempel sajan ussa anc da scriver novas cartas da menu per ils restaurants e nettegiar els. Quai saja en cumparegliaziun dentant ina sfida plitost pitschna; occupar tut las plazzas libras en la gastronomia saja quest onn stà plitost grev. Entant hajan tut las plazzas pudì vegnir occupadas, quai però bundant in mais pli tard che usità.
Co statti si Brambrüesch?
Er tar las pendicularas Cuira Brambrüesch saja la tschertga da persunal mintg'onn in tema grond. Els hajan quest onn cumenzà pli baud a tschertgar persunal per evitar ina mancanza, di il manader da las pendicularas Patrick Arnet.
Quest onn avain pudì occupar fitg bain las plazzas libras en la gastronomia. Per occupar las plazzas a la cassa avain gì dapli bregia, e quai n'è ils ultims onns anc mai capità.
Uschia dettia tenor el cunzunt en connex cun la tschertga da persunal mintg'onn puspè surpraisas.
Speranza a Veulden per blera naiv
Strusch surpraisas haja dà a Veulden, nua che las pliras lavurantas ed ils plirs lavurants vegnian mintg'onn puspè, uschia che tut las 18 plazzas han pudì vegnir occupadas senza problems.
Nus pudain profitar da glieud che sa gia tge ch'ella ha da far.
Roman Bernard spera ussa sin in enviern cun blera naiv e bleras visitadras e blers visitaders, per ch'els possian en il futur puspè investir daners en il manaschi.