Las pendicularas Cuira Dreibündenstein BCD han preschentà il rapport da la stagiun 2024/25. In onn da gestiun cun success, sco ch’els dian, cun in gudogn da passa 380’000 francs. Sch’els guardan sin l’infrastructura, alura è surtut necessari da renovar la part sura, la segunda secziun da la pendiculara. Questa saja a la fin da lur durada da vita ed igl è cumplitgà da survegnir tocs per reparar. La segirezza da questa part saja adina tema en il cussegl d’administraziun, manegia il commember Peter Engler.
Il pretsch
In auter tema era la nova pendiculara che duai vegnir bajegiada. Dal 2019 ha il pievel da Cuira ditg Gea ad in credit da 24,4 milliuns francs cun in spazi da 25 % – pia avess la pendiculara pudì custar maximalmain 30,5 milliuns francs. Cun l'ir dals onns è era sa midà il project, surtut la careschia ha auzà il pretsch. Uss discur'ins d’in project che custa enturn 40 milliuns francs. Quel na pertutga betg mo la pendiculara, mabain tschintg milliuns èn era vegnids tiers per l'areal enturn la staziun da val. Tuttina è il pretsch pli aut che quai che la populaziun ha dà il Gea.
Process politic actual
Cun quest augment da 30 milliuns sin 35 milliuns – respectiv 40 milliuns per tut – ha il parlament da Cuira pretendì ina nova votaziun. Actualmain è la suprastanza da Cuira ad elavurar ina missiva per surdar al parlament. Uschia ch’il project stat per il mument airi. Peter Engler dal cussegl administrativ da la BCD fa quint che la discussiun en il parlament vegnia anc ad avair lieu quest onn. Sch'il parlament è d’accord cun la missiva, alura vegn questa davant il pievel. Quai pudess alura esser il mars 2026. Pia dovri sco emprim il consentiment dal parlament e suenter era dal pievel per ch’il project possia vegnir realisà.
Cunvegna cun citad
Sch'i dat in Gea, alura sto la BCD anc vegnir ensemen cun raps, per che la citad da Cuira sustegnia il project. Els han numnadamain ina cunvegna, che las pendicularas ston avair reservas da dus milliuns francs, per che la citad sustegnia. Peter Engler di, ch’els hajan ensemen ina part, dentant betg anc tut. Da tgi e sco, quai n'ha il commember dal cussegl administrativ betg vulì dir.
Urari
Anc quest onn duai il parlament discutar davart la missiva. Sche questa vegn approvada alura vegn il project en primavaira davant il pievel, prubablamain in mars 2026. Suenter sto la BCD anc ir per tut ils permiss ed alura pudessan las lavurs da construcziun cumenzar la primavaira 2027. E la fin 2028 u cumenzament 2029 pudess alura l’emprima gondla da la nova pendiculara ir si Brambrüesch. Fin là dovri dentant anc dus giadas in Gea e raps.