Questa stad cumenza l’emprima etappa da construcziun cun investiziuns da var trais milliuns francs per il provediment d’aua e per ennavar la pista a val, la via da scarsolar e la staziun da muntogna Tanatzhöhi. Finanzià vegn il project da set vischnancas al sid da la Viamala sco er da la vischnanca burgaisa da Favugn. Ulteriuras etappas d’amplificaziun per var 4,3 milliuns francs èn planisadas ston dentant anc vegnir finanziadas.
Pendicularas cun paucs daners
Las pendicularas da Spleia Tambo n'èn betg benedidas cun raps. Tuttina vul l'organisaziun renovar ils sistems d'ennavaziun. Actualmain capitia anc bler a maun e cun grond sforz. Ins na saja betg cumpetitiv, manegia il mainafatschenta Fabian Koch. Cun ina nov'organisaziun che surpiglia l'ennavaziun da Spleia Tambo speran ins da midar quai – ed era da meglierar la situaziun finanziala.
Nov'organisaziun – finanziada er da las vischnancas
Per l'emprima etappa da quellas investiziuns quintan ins cun custs da 2,98 milliuns francs. Quella cumpiglia il provediment d'aua, la renovaziun dals indrizs d'ennavaziun tranter Tanatzhöhi e la staziun da val sco er ennavar da nov la scarsolera. En ulteriuras etappas vai lura tranter auter vid las pistas.
Il chapital d'aczias da la Tambo Finanz-Infra SA munta a 1,7 milliuns francs – vitiers duai dar garanzias da radund 2 milliuns da las vischnancas. Cun questa finanziaziun po vegnir realisada l'emprima e la pli impurtanta etappa. Part da la collavuraziun regiunala fan las suandantas vischnancas, che han tuttas dadas lur consentiment.
- Valragn: ha concedì 773'000 francs per la Finanz-Infra SA, (16 d'october)
- Andeer: ha concedì in credit da 250'000 francs (29 d'october)
- Sufers
- Farera: ha concedì ina participaziun cun 40'000 francs (9 da december)
- Muntogna da Schons
- Ziràn-Reschen
- Rongellen
Sco motivaziun survegnan las abitantas ed ils abitants da las vischnancas ch'han era aczias in rabat da 50% sin las cartas da stagiun.
Per l'ulteriur svilup da lur territori cun dapli pistas e da pli capacitads vulan las Pendicularas Spleia Tambo er examinar sch'il chantun pudess gidar en il rom dal program per infrastructura turistica relevanta per il sistem.
Sustegn dals indigens
Durant l'occurrenza d'infurmaziun dals 9 d'october hai dà tenor atgnas indicaziun gronda chapientscha e sustegn per renovar l'infrastructura da far naiv. Ils responsabels han rendì attent ch'i saja ussa il mument ideal per questa investiziun, cunzunt suenter ina stagiun d'enviern 2024/25 cun il meglier resultat per las pendicularas svizras dapi 15 onns.
Las pendicularas Spleia Tambo n'hajan dentant betg pudì far part da quest svilup positiv. Quai pervi da las cundiziuns da naiv difficilas. Las investiziuns planisadas na duain betg mo augmentar la segirezza da naiv, mabain er augmentar l'attractivitad da la regiun cun meglierar purschidas d'alloschament e da temp liber. Sut il stritg vegn la renovaziun da l'infrastructura valitada sco pass decisiv per il futur.
Dapli custs per ils indrizs...