Il mument èn las previstas bunas per il territori da skis Spleia Tambo. Ina cuntrada alva, nua ch'ins guarda. La stagiun passada n'è dentant betg emblidada. Quai di il mainafatschenta ad interim Peter Engler.
Ins sentia schon l'influenza da l'onn passà e da las turbulenzas. Or da la populaziun vegnia dumandà, sche l'interpresa haja tut en ils mauns. Quai sa midia dentant, perquai ch'ins vesia ch'i saja ì bler sin il culm. La naiv saja qua, e las loipas da passlung sajan gia avertas.
Spleia Tambo ha investì en in meglier sistem d'ennavar. Quai malgrà che las pendicularas han scrit in minus da var 390'000 francs l'onn passà. Peter Engler conceda era, che las pendicularas na «ruaussan betg sin rosas». I vegnia a restar ina sfida da mantegnair la liquiditad.
Era sch'ils dus novs, Peter Engler ed il president dal cussegl administrativ Peter Tschirky, hajan blera experientscha, na schlia quai betg tut ils problems. Ma las cundiziuns sajan uss meglras. Peter Tschirky di, ch'i dovria in tschert ruaus. Lura possia ins sa fatschentar cun il futur e cun la strategia.
Cun il nov sistem d'ennavar quinta Spleia Tambo d'avair paucs quitads, ch'in scenari sco dal schaner passà sa repetiss.
