En las giassas da la citad veglia, la via da la posta e la via da la staziun a Cuira hai ina massa glieud en gir. Tgi cun carotscha ed uffants, tgi cun tastgas plainas cun cumpras – in detg travasch quels dis en la chapitala grischuna. Tranter auter era persunas dad ordvart che fan visita en il Grischun.
Mia collega è aposta vegnida si da la Bassa or da la tschajera per passentar in zic temp ensemen, giudair il sulegl e baiver café.
Auters han in termin specific, sco per exempel laschar far las unglas u far cumpras e probabel è er inqual per las stizuns enturn per barattar in u l'auter regal da Nadal.
Nus giain a barattar la «Toniebox» che n'ha betg funcziunà sco regal da Nadal.
-
Bild 1 von 3. Patinera a Cuira. Bildquelle: RTR.
-
Bild 2 von 3. Blera glieud va en las stizuns tranter Nadal e Bumaun. Bildquelle: RTR.
-
Bild 3 von 3. Bildquelle: RTR.
En sasez fissan ils dis tranter Nadal e Bumaun er il temp dad ir sin pista. Per ils ins n'è quai dentant independentamain da l'aura u las circumstanzas da naiv in'opziun, igl haja uschè u uschia memia blera glieud sin pista. Els spargnian quai per il schaner e favrer.
Sch'ins guarda a las muntognas na fai nagin gust dad ir sin pista. Perquai essan nus restads en val.
Sch'ins guarda si per las plauncas dals territoris da skis che fan actualmain plitost parita da primavaira che d'enviern na fa quai er betg exnum gust dad ir sin pista.
Jau hai nagin gust dad ir sin pista sch'igl n'ha nagina naiv. Per ir sin pista dovri naiv sco ch'i tutga.
Per inqualins para la patinera a Cuira dad esser ina buna alternativa. Surtut famiglias han fatg diever da quella purschida.