La maschina da pista cun il num «Prinoth Leitwolf» è in zic sco in termagl per buobs gronds. Ella ha ina paisa da 14 tonnas e 530 forzas-chaval. Il «buob grond» che manischescha è Silvio Candinas che ha 33 onns. Senza naiv artifiziala na giess actualmain insumma nagut.
Silvio Candinas vesa pragmatic la situaziun. Els fetschian il pussaivel e dettian tutta fadia da preparar la pista cun la naiv che saja avant maun. Finalmain giaja a tuts tuttina e l'aura na poss'ins betg influenzar – i pudess esser mender.
La maschina da pista mesira cun agid da GPS l'autezza da la naiv. Sin il visur ch'ha la grondezza d'in tablet vesa Silvio Candinas sin il model da la cuntrada nua ch'igl ha quanta naiv.
La saira suenter ch'ils osps èn ids a chasa stauscha el si la naiv – là nua ch'ella è vegnida stuschada giu dals skiunzs durant il di. E lura vegn la pista fatga cun il tagliurn ch'è montà davosvart tar la maschina da pista.
E la pista sto lura esser picobello – sco in tarpun. Ins pudess schon era far pli simpel, di Silvio Candinas, ma els sajan heiclis ed hajan gugent pistas perfetgas.
-
Bild 1 von 5. Vista da la staziun a val a Mustér en direcziun dal territori da skis. Bildquelle: RTR.
-
Bild 2 von 5. Las duas maschinas da pista c'èn en acziun quella saira. Bildquelle: RTR.
-
Bild 3 von 5. Silvio Candinas en acziun. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Sch'igl ha blera naiv èn els mintgamai en acziun en quatter en l'entir territori. Actualmain van els dentant mo en dus – pli pauca naiv munta era pli pauca lavur. Els guardian che tut ils tschintg maschinists hajan da far in zic, ed hajan perquai er adattà il ritmus da lavur.
Per ch'il dess lura puspè lavur sco s'auda, stopp'ins en num da Dieu spetgar fin che la naiv vegn da surengiu. Per Silvio Candinas è l'ir cun la maschina da pista durant l'enviern dentant passiun e hobi. La lavur sin pista fa el tenor il motto:
Dapli naiv e pli taiss ch'igl è – pli interessanta che la lavur è. Lura pon ins propi far da biestg cun la maschina.