Siglir tar il cuntegn

Header

audio
La davosa cursa da Nordiculinaric hai dà il 2020.
Or da Actualitad dals 09.02.2024. Maletg: Stefan Schwenke
laschar ir. Durada: 4 minutas 55 Secundas.
cuntegn

Nordiculinaric 2024 L’ediziun da giubileum dat puspè en l’aua

Pervia da mancanza da naiv na datti er quest onn nagin Nordiculinaric, la cursa da passlung culinarica da Trun a Mustér. Quai han decis ils organisaturs bun in’emna avant l’occurrenza che fiss stada la sonda, ils 17 da favrer 2024.

Igl è gia il quart onn che questa cursa sto vegnir annullada. Ils emprims dus onns, il 2021 e 2022, pervia da la pandemia da corona ed ils davos dus onns, il 2023 e 2024, pervia da mancanza da naiv. Ils organisaturs cun il president Alois Tambornino speran uschia ch’i gartegia finalmain il 2025 cun questa ediziun da giubileum, 10 onns Nordiculinaric.

Nus essan in zic en in rudè dal diavel, malgrà che nus essan stads fin dacurt fitg optimists.
Autur: Alois Tambornino president

Ils organisaturs èn ditg stads da buna speranza da pudair manar atras quest event, cunzunt suenter ch’igl aveva dà passa in mez meter naiv al cumenzament da la stagiun, l’entschatta december. Bun 70 dis è Nordic Surselva vegnì da tegnair ina buna loipa tranter Trun e Mustér. La plievgia e cunzunt er las temperaturas miaivlas han dentant maglià davent la naiv. Ed uss saja la loipa uschè satiglia ch’i na saja er betg pli pussibel dad ir cun la maschina da loipa, er perquai ch’i saja be pli ina crusta da glatsch, di il schef da la loipa, Flurin Maissen. Far naiv na saja il mument er betg pussibel tar questas temperaturas da primavaira e l’arsenal da naiv saja duvrà si, precisescha Maissen.

La plievgia en cumbinaziun cun il favugn, quai è il mender per nossa loipa.
Autur: Flurin Maissen schef loipa

Ceder u schizunt sutterrar quest’occurrenza na vulan ils organisaturs però betg. Els hajan er ina tscherta responsabladad envers las participantas ed ils participants sco er envers ils sponsurs che dettian onn per onn sustegn, uschia Alois Tambornino. Uschia è gia decidì che quell’ediziun da giubileum duess avair lieu en in onn, il 2025.

Occurrenza sportiva, culinarica e romantica

Premiera aveva quest’occurrenza gì il 2012, lura anc sut il num Surselva Classic. Intgins onns pli tard han ins dentant er vulì laschar parter curridras e curriders en il stil liber e be sulet en il stil classic sco il num scheva da lezzas uras. L’occurrenza, nua ch’i va en emprima lingia per passentar in bel di en buna cumpagnia cun amias ed amis dal passlung, ha spert chattà grond interess. Uschia hai dà ediziuns cun passa 200 curridras e curriders. Cumenzà vegn il di mintgamai cun in brunch a Trun, silsuenter vegn sa mess communablamain en loipa vers Mustér ed enavos. Sin viadi vegn purschì bavronda ed intginas spezialitads culinaricas. Tar la Destillaria Candinas a Surrein vegn prendì in apero avant che sa render enavos a Trun nua ch’i spetga mintgamai in gentar, savens pulenta cun fratem e groma, e quai en in ambient fitg famigliar cun musica en las localitads da la Scrinaria Tarcisi Maissen.

RTR actualitad 17:00

Artitgels legids il pli savens