Medel - Da trais puspè sin tschintg suprastants

La primavaira 2027 ha il suveran da Medel d’eleger ses gremis communals per la proxima perioda d’uffizi da trais onns. Gia quest atun vegn el clamà a l’urna per eleger ina successura u in successur per il suprastant Werner Venzin che sa retira per la fin da l'onn. «Nus avain installà ina gruppa da lavur. Ella sa fatschenta da la successiun dal suprastant partent», di il president communal da Medel, Claudio Simonet envers la FMR. El spera ch’i reusseschia a la gruppa da lavur da chattar ina candidata u in candidat per il rest da la perioda d’uffizi actuala, vul dir per in onn e mez.

Garantir la successiun

Tenor Claudio Simonet ha la gruppa da lavur dentant anc in ulteriur pensum: «Ella sa fatschenta era da la suprastanza communala 2027. Lura vegn jau a chalar sco president communal ed era il suprastant Corsin Flepp ha ditg ch’el sa retira lura.» Il prim da fanadur 2027 cumenza numnadamain la proxima perioda d’uffizi da trais onns. «Nus vesain ch’ils giuvens sentan ch’i fa da basegns da guardar per ina successiun per la suprastanza communala. Differents han era gia laschà sentir ch’els fissan pronts da surpigliar responsabladad en vischnanca. Quai mussa era la buna preschientscha da glieud giuvna a las ultimas radunanzas da vischnanca. Els n'èn dentant betg mo preschents, mabain s’expriman era», di Claudio Simonet.

Da trais sin tschintg?

Ils 29 d’avrigl 2018 han votantas e votants da Medel acceptà la revisiun parziala da la constituziun communala. En quest connex è il dumber da commembras e commembers da la suprastanza communala vegnì reducì da tschintg sin trais. Plinavant è vegnì decidì d’introducir la funcziun d’in substitut per la suprastanza communala. Ins sentia dentant ch'i saja fitg bler lavur per be trais persunas, di Claudio Simonet.

En tschintg dettia la chaschun da reparter pli fitg il pensum da lavur da l’executiva communala. Ina tala midada pretendess danovamain ina revisiun da la constituziun communala.

Or da l'archiv: