Purschidas culturalas e museums èn per regla da chattar en citads e lieus pli gronds. Ma quai è sulet la regla, la realitad è ina autra. Uschia datti era da vesair en vischnancas pli pitschnas interessantas purschidas. Per exempel a Curaglia en Val Medel.
Qua è vegnida averta la purschida culturala «La Vitrina» en ina stalla amez il vitg. Quella exposiziun è dentant per gronda part visuala e sa basa sin 12 films che mussan differents aspects da l’istorgia da la Val Medel.
Las massa fotografias furman la basa
Inizià il project ha Albert Lutz. El ha ragischs en Val Medel, è dentant creschì a Cuira senza emprender rumantsch. Suenter studis d’istorgia d’art ha sia via manà el en il mund d’art surtut asiatic. Suenter plirs onns en l'exteriur ha Albert Lutz manà il museum Rietberg en la citad da Turitg dal 1998 fin sia pensiun.
Suenter la pensiun è el returnà adina dapli a Soliva, in vitg ella val Medel, ed el ha cumenzà a ramassar fotografias da quella val. E la finala ha el chattà dapli che 600 fotografias da la val Medel tranter ils onns 1870 e 1920. Cun quai è l’idea naschida da far films cun differents temas, per exempel la naschientscha da la hotellaria en la val ni era da l’istorgia da la viafier sur il pass Lucmagn. La finala ha quai dà 12 films, cun integrar dapli che 400 fotografias, e set da quests films èn era sonorisads per rumantsch, di Albert Lutz.
Project è pir a l’entschatta
Il proxim temp resta uss l’exposiziun actuala. Quella è era accessibla mintgadi da la damaun da las nov fin la saira a las set. L’access a l’exposiziun è gratuit. Tras films: Quai saja l’idea fundamentala da mussar a moda nuncumplitgada l’istorgia e la cultura a mintgina, e quai era quasi da tut temp, di Albert Lutz.
Ma il project n'è anc betg finì. Uschia datti anc fitg blers temas che pudessan vegnir visualisads. Actuala vegni surtut dà in sguard en il passà, ma proxims films vegnan era a s’occupar per exempel cun energia, ni cun la digren dals glatschers, cun l’agricultura e forsa era cun las troccas, di Albert Lutz.
Ils temas sajan avant maun ed il plaschair da realisar els era, di Albert Lutz che furma il coc dal project ensemen cun Daniela Kienzler, Rico Tuor e Gabriel Venzin.
