Dacurt è la cumissiun da turissem vegnida fundada. En quella surprenda Daniela Kienzler (43) la lavur operativa. Ella ha in pensum da 40% tar la vischnanca da Medel. Dapi passa in onn viva ella a Curaglia. Da professiun è ella fotografa ed inschignera da l’ambient. Sia famiglia ha in'abitaziun secundara en il Vallais, ed uschia è ses interess per turissem e regiuns periferas vegnì sveglià.
Sviluppar la Val Medel sco destinaziun turistica
La Val Medel haja ella emprendì d’enconuscher entras ses studi. Alura haja ella gì la chaschun da far ina stad in praticum en vischnanca, e la finala saja ina plazza vegnida offrida ad ella. Ina part da sia lavur saja da sviluppar la Val Medel sco destinaziun turistica.
La strategia è da preschentar las valurs da la natira e la cultura.
Senda da baselgias e chapluttas
Sper ils projects da turissem sa fatschenta ella cun temas da la societad sco per exempel las schanzas da la digitalisaziun. Gia realisà haja ella la signaletica (in agid per ils giasts da s’orientar e da chattar attracziuns sco la punt pendenta a Mutschnengia ubain l’Academia Vivian). E Daniela Kienzler ha era realisà la senda da baselgias e chapluttas en Val Medel ensemen cun il plevon Giusep Venzin.
En sia lavur da bachelor ha ella tractà la dumonda, sch’ils indigens e possessurs d’abitaziuns secundaras fissan pronts da s’engaschar en vischnanca. Il resultat mussa ch’ina gronda part fiss pronta da lavurar en tscherts secturs.