Ina brev ch’ina scola sursilvana ha da curt scrit als geniturs dals uffants da la 5avla e 6avla classa n'ha strusch procurà per plaschair. La scola annunzia ch'i saja sa mussà che singuls uffants consumeschian regularmain pornografia. «Els tarmettan in a l’auter videos, maletgs e pleds nuschaivels.» Il fenomen che la scola sursilvana ha plidentà è detg derasà. Quai almain tenor las indicaziuns da l'organisaziun Protecziun svizra da l'uffant, ina fundaziun independenta che s’engascha tenor atgnas indicaziuns per proteger uffants da violenza.
Impurtant da collavurar
En la brev als geniturs fa la scola attent ch’i na saja betg pusseivel a scolaras e scolars da visitar paginas pornograficas e da violenza via ils laptops surdads da la scola per duvrar els en l'instrucziun. Quels laptops sajan equipads cun filters ch’impedeschian l'access a talas paginas.
La scola appellescha a la responsabladad dals geniturs da tegnair en egl il diever dals apparats privats dals uffants: «Nus essan perschuadids ch’igl è impurtant che scola e geniturs collavurian en quest grà per il bun da l'uffant.» Tegnair en egl l'apparat da l'agen uffant è bain giavischaivel.
Blers geniturs surdumandads
Silvio Dietrich che porscha via sQuola.ch cussegliaziun e sustegn en dumondas da scola constatescha che blers geniturs èn surdumandads quai che pertutga il diever dal telefonin da l'agen uffant. El puntuescha però che la cussegliaziun ed il support da sQuola.ch na tematiseschia betg il diever da pornografia en scola. «Cun questa tematica sa fatschentan autras organisaziuns sco per exempel Adebar u il post da prevenziun da la polizia chantunala.»
Scumandar il telefonin en scola, e durant in temp laschar far ils uffants, tge ch'els vulan cun quest apparat, na gida betg bler.
Intermediar cumpetenzas enstagl da scumandar
Nà da ses anteriur engaschi sco mainascola sa Silvio Dietrich ch’il telefonin è in grond tema tar geniturs e scolars. «I n'è betg simpel per ils geniturs da restrenscher il diever dals telefonins a lur uffants.» El ha constatà che blers geniturs fissan leds, sch’il telefonin vegniss scumandà en scola: «Scumandar il telefonin en scola e durant in temp laschar far ils uffants, tge ch'els vulan cun quest apparat, na gida betg bler.» Il cussegliader ed anteriur mainascola è persvas ch’i na dat nagina autra opziun ch’intermediar a scolaras e scolars, co manischar la tecnologia mediala moderna.
Installar barrieras
Cun manischar la tecnologia mediala moderna èn giuvnas e giuvens magari in bun tant pli avanzads che persunas carschidas. Ch’i dat filters e barrieras ch’impedeschan l'access ad uffants sin paginas che derasan violenza e pornografia conferma Marc Cathomen. «Teoreticamain pon ins però era surmuntar u guntigr questas barrieras.» Il scolast ed informaticher manaja però che quai na saja betg usché simpel e ch'i dovria intgina savida per guntgir las barrieras.
Mo las barrieras en il laptop da la scola han in effect restrenschì, sche scolaras e scolars han access via l'agen telefonin a quai ch’els duessan atgnamain betg avair access. El puntuescha ch’i saja senz’auter pussaivel da restrenscher l'access dals uffons via lur agens telefonins sin paginas cun purschidas betg giavischadas. «Quellas pussaivladads da restrenscher l'access als uffants porschan ils servetschs da communicaziun sco Swisscom u Sunrise u era applicaziuns sco Cloudflare», aschunta Marc Cathomen.
Infurmar e discussiunar
La scola sursilvana ch'ha plidentà visavi ils geniturs il diever da pornografia en scola envida proximamain ils geniturs ad ina saira d’infurmaziun e discussiun per sa fatschentar cun la prevenziun digitala.
Gugent avess la FMR era discurrì cun l’organisaziun Adebar che presta servetschs da prevenziun en las scolas grischunas en chaussa medias socialas e sexualitad. Deplorablamain n'è la promtadad da dar scleriment davart la tematica betg fitg gronda. Infurmaziuns detagliadas porscha però la pagina da la Protecziun svizra da l'uffant.