Siglir tar il cuntegn

Header

cuntegn

Mumpé Medel Nova punt duai dar nov schlantsch

Il vischinadi da Mumpé Medel è visavi il vitg da Mustér. Ina gruppa d’interess vul realisar ina punt pendenta. Ultra da quai è er planisà in museum militar.

Il vischinadi da Mumpé Medel è in dals vischinadis da Mustér che sa chatta sin la vart dretga dal Rain. E gist sur quest Rain duai dar l’emprima punt pendenta. La gruppa d’interess ha inoltrà gia dapi la stad il preproject al chantun ed a las organisaziuns d’ambient. Uschia duai dar in access per peduns vi da tschella vart da la val.

Schanza per l'agroturissem

La punt saja d’ina vart in access per ils abitants da Mumpé Medel, di il suprastant e convischin da Mumpé Medel, Wendelin Jacomet. Uschia saja l’ultim temp stà serrà pli savens la via en direcziun da la Val Medel e perquai era l’access a Mumpé Medel. Cun ina tala punt pendenta fiss il viadi en direcziun Mustér pli curt, sche la via stuess vegnir serrada in'autra giada. Ma era per turists duai la punt porscher ina interessanta via, en direcziun Val Medel u la Val Tujetsch ubain en direcziun Stagias.

Museum militar

Era planisà pli concret è il museum militar che duai vegnir realisà ord la fortezza existenta a Ragisch. Gist nua che la punt pendenta vegn vi da Sontga Gada datti ina fortezza. Quella è il mument venala e la vischnanca ha gia il contract da cumpra sin maisa. Quai bajetg saja favuraivel da cumprar per la vischnanca e cunquai che l’uniun «Fortezia Stalusa» saja interessada da far accessibel la fortezza sco museum, saja quai fitg attractiv.

Era il co-president da l’uniun, Fredy Caminada, è persvas dal project. Quai bunker saja in proto-tip da tals stabiliments e la Confederaziun haja sulet paucs da quels. Perquai saja l’object anc pli interessant per els. Da vesair è in bittaminas che duai vegnir renovà ed uschia fatg accessibel. Era gia al lieu è in bunker d’ina persuna. Quel saja vegni exchavà durant lavurs e l’uniun haja pudì cumprar el. Quai era in post d’observaziun, nua ch’in fin duas persunas observavan l’inimi ed inditgavan en cas urgent las coordinatas per sajettar las minas, declera Fredy Caminada. L’uniun saja vegnida fundada gist per mantegnair l’ierta militara, las fortezzas e saja uschia pronta era dad investir en quest project.

RTR actualitad 17:00

Artitgels legids il pli savens

Scrollar a sanestra Scrollar a dretga