A Mustér ha il cussegl da vischnanca concedì in credit da 295'000 francs per furmar da nov l’areal da scola e per sanar ils plazs avant la halla Cons e la scola veglia. Perquai che l'areal da scola vegn era duvrà per occurenzas sco la dretgira nauscha, la fiera da Nadal, la festa dal vitg u lieu da sentupada da tut gener vul ins crear in areal che cuntentia il manaschi da scola sco er ils basegns dals convischins, uschia la communicaziun. Il credit vegn suttamess al referendum facultativ.
Plinavant ha il cussegl concedì in credit da 112'000 francs per adattar il passape Via Cons.
Quint communal Mustér 2014-2018
Onn da gestiun | Entradas (en francs) | Expensas (en francs) | Gudogn (en francs) |
2014 | 14'817'970.- | 14'506'719.- | 311'251.- |
2015 | 18'185'430.- | 17'912'079.- | 279'350.- |
2016 | 15'250'258.- | 15'004'113.- | 246'145.- |
2017 | 15'427'045.- | 14'975'905.- | 451'140.- |
2018 | 15'487'507.- | 15'250'412.- | 237'094.- |
Quint 2018
Il quint da gudogn e sperdita 2018 serra cun custs da 15'250'412.40 francs e retgavs da 15'487'506.94 francs. Il quint da gudogn serra uschia cun in surpli d'entradas da 237'094.54 francs. Ils ultims tschintg onns ha la vischnanca nudà mintg'onn in gudogn. En cumparegliaziun cun il 2017 è quel dentant sa sminuì per radund 200'000 francs. Era las expensas ed entradas dals ultims tschintg onns sa movan sin in livel da radund 15 milliuns francs.
RR novitads 06:00