«Per questa dumonda ha Marcus Weber duvrà in pau dapli temp da ponderar.» Quant temp da ponderar ch'il president dal cussegl d'administraziun da las pendicularas da Mustér ha duvrà, n'ha il president communal da Mustér, René Epp, betg tradì il venderdi passà en la Sala Peter Kaiser da la claustra da Mustér. Envidà aveva la suprastanza communala la populaziun per infurmar davart ils projects e las investiziuns previsas a Mustér ils proxims onns. E tranter quellas investiziuns sa chattan era projects finanzads da l'investider ch'ins po titular senza auter sco bun padrin da la vischnanca da Mustér, Marcus Weber.
Purschida per famiglias
In nov edifizi planisà sco parc da gieu e moviment gist sper il Center Fontauna duess porscher en l'avegnir activitads per uffants e giuvenils da temps da malaura. Marcus Weber ha fatg attent als basegns turistics da Mustér da daventar ina destinaziun che carmala turistas e turists era durant la stad en la Cadi. «Per quest intent stuain nus sco destinaziun da famiglias era porscher insatge per las famiglias.» Tranter nov e diesch milliuns francs èn las pendicularas respectivamain Marcus Weber promts da spender en la nova halla da recreaziun. Ed el è era stà pront suenter il temp da ponderaziun d'integrar en quella halla gist anc in lieu da trenament per la gruppa Acrobatica Cadi.
Tenor las indicaziuns da René Epp dat ei mo trais sumegliants centers da trenament en Svizra – ed el è persvadì che Mustér po profitar da questa nova purschida. E sco quai ch'i para è era Marcus Weber persvadì da profitar, essend ch'el surpiglia ils custs da construcziun e las pendicularas il manaschi. La vischnanca sto perencunter desister d'in emprest da 1,8 milliuns francs ch'ella aveva concedì a las pendicularas. La votaziun davart questa fatschenta succeda il mars 2026 ed ella cumpiglia era la dumonda da ceder il terren en dretg da construcziun.
Center da sanadad
Ceder en dretg da construcziun a Marcus Weber vul la vischnanca da Mustér era la scola da Segnas. Là vul Marcus Weber investir en in center da sanadad. Quant ch'el è pront d'investir en quest project n'ha el betg tradì. Marcus Weber ha discurrì d'in provediment da sanadad mancant sisum la Surselva, e che quel stoppia vegnir meglierà er ord vista turistica. «Natiralmain che la populaziun indigena po era profitar da la purschida.» Dar a fit l'edifizi vul Marcus Weber al Spital regiunal Surselva ch'avess da surpigliar il manaschi. René Epp ha ditg il venderdi passà ch'il cussegl d'administraziun dal Spital regiunal Surselva haja decidì da persequitar questa fatschenta. El vesa medemamain la necessitad da meglierar la purschida medicinala era en vista als novs ressorts turistics planisads a Mustér ed a Dieni. Interessanta vegn segir la discussiun entaifer la SanaSurselva, la corporaziun da las vischnancas sursilvanas responsabla per il provediment da sanadad, davart in center da sanadad a Mustér manà dal Spital regiunal Surselva.
Augmentar ils debits
Era senza las considerablas investiziuns da Marcus Weber a favur dal svilup turistic sisum la Cadi sto la vischnanca tanscher lunsch en l'atgna bursa per realisar ils proxims projects. René Epp ha declerà nua e quant che la vischnanca prevesa dad investir ils proxims quatter onns: Il lavuratori communal, la sanaziun da la via Cons gia decidida dal pievel, la segunda etappa dal Center Fontauna, ed en la serenera vul e sto la vischnanca per part era investir. Betg main che passa 20 milliuns francs prevesa la vischnanca da Mustér da spender en quests projects.
Il cash-flow futur supponì d'annualmain 2,5 milliuns francs na tanscha betg per finanziar tut ils projects cun agens meds, uschia che la vischnanca sto augmentar ils debits actuals da passa 12 milliuns francs per ulteriurs diesch milliuns. Per René Epp è quest sforz necessari per mantegnair l'attractivitad da la vischnanca – ed el è persvadì che Mustér po supportar ils debits. «Nus na surpassain betg las limitas maximalas ch'il chantun definescha per ils debits communals.» Mo René Epp sa che la suprastanza communala na po betg mo prender in temp da ponderar sco l'investider Marcus Weber per decider in'investiziun. «Mintga singul project vegn tractà e decidì dal cussegl da vischnanca e sco davos dal suveran.»
Ina decisiun ha il suveran da Mustér gia da prender ils 30 da november 2025 – quella per cumprar l'areal Couchepin-Hess amez il vitg da Mustér. Il president communal ha medemamain preschentà quest project e tradì, che la suprastanza speria sin in cler Gea per il credit da trais milliuns francs.