Il cussegl da vischnanca da Mustér ha approvà il concept communal da bike. El ha concedì il credit da 475’000 francs per ils onns 2021 fin 2024, scriva il cussegl da vischnanca. Quel duai vegnir nizzegià per sanar differentas sendas da velo existentas e per crear novas. Plinavant persequitescha la vischnanca vinavant il project «Gotthard-Labyrinth» – in project regiunal da la Surselva ed ils chantuns Tessin ed Uri.
La decisiun vegn suttamess al referendum facultativ.
Ulteriuras decisiuns
Il cussegl da vischnanca ha er prendì per conuschientscha il project «la pendenta». Quel prevesa ina punt pendenta cun ina lunghezza totala da 300 meters da Sontga Gada a Mumé Medel. Il project, che duai vegnir realisà ils proxims dus onns, custass 1,8 milliuns francs – 1,1 milliuns surpigliassan persunas privatas.
Plinavant ha il cussegl da vischnanca approvà la revisiun parziala da las statutas da l'Uffizi dal register funsil Cadi.
