Siglir tar il cuntegn

Header

cuntegn

Mustér Daco ha la cumissiun da bajegiar abditgà en globo?

Ils quatter commembers da la cumissiun da bajegiar da Mustér han abditgà sin la fin da quest onn, quai èn ils motivs.

Per la cumissiun da bajegiar èsi stà impurtant da discussiunar sur dals motivs per lur demissiun en globo. Els na sajan mai stads sut squitsch en connex cun decisiuns ch’els han gì da prender. Quai saja impurtant d’accentuar, han ils quatter umens da la cumissiun ditg en in discurs cun RTR. Tuttina na veglian els betg purtar chaussas persunalas en la publicitad, ma mussar ch’els n’hajan betg agì nunponderà. Avant il microfon n'han els betg prendì posiziun.

Fatg propostas per meglierar process

Gia l’avrigl 2022 hajan els en in discurs cun il president communal René Epp fatg attent ch'i saja necessari da far midadas. Per exempel han els numnà la communicaziun sco debla. Quai hajan ins suenter quest discurs midà, accentuescha il president communal, dapi lura datti mintg’emna in'entupada tranter il responsabel infrastructura, il manader da l'uffizi da bajegiar, il suprastant responsabel ed il president communal.

Era fatg attent ha la cumissiun che las structuras actualas sajan cumplitgadas. Els avessan gugent lavurà dapli ed era surpiglià responsabladad cun decider las dumondas da bajegiar. Ma per far ina tala midada fissi stà necessari da midar la constituziun e quai basegnia temp e na possia betg vegnir fatg simplamain a curta vista, accentuescha René Epp. Qua hajan ins uss engaschà in'interpresa externa il november ch’examinescha gist quels process e fa proposta co simplifitgar e far pli effizient las vias da decisiun. Ils resultats spetga il president communal la primavaira.

audio
Mustér: motivs per la demissiun da la cumissiun da bajegiar
ord Actualitad dals 22.12.2023. Maletg: RTR
laschar ir. Durada: 4 minutas 21 Secundas.

Betg tuttas dumondas han la medema prioritad

Ina da las reproschas è che las dumondas da bajegiar n’han betg tuttas la medema prioritad. Uschia dettia quai cas, nua ch’il patrun haja direct pudì ir tar la suprastanza per laschar tractar la dumonda, ha la cumissiun da bajegiar partenta ditg en il discurs. Quai na saja betg il cas, ha il president communal accentuà. En la fasa finala d’ina dumonda, cura ch’ina decisiun stoppia sin maisa, haja quai dà che la dumonda saja vegnida tractada cun auta prioritad, ma adina per il bainstar da la vischnanca, accentuescha René Epp.

Per el saja impurtant che las decisiun vegnian era prendidas a temp. Ed els sco gremi che decida, possian er accelerar tschertas decisiuns, pertge las dumondas da bajegiar vegnan decididas tenor constituziun da la suprastanza. Perquai conferma el era che la cumissiun da bajegiar haja survegnì in'invitaziun per in inscunter l’avantmezdi e la decisiun haja stuì vegnir prendida il suentermezdi. Mintgatant saja impurtant d’esser svelt.

Nagin dialog cun las persunas partentas

In punct che la cumissiun da bajegiar ha menziunà è che nagin da la vischnanca haja tschertgà il dialog suenter ch’els han demissiunà en globo. Els hajan survegnì ina brev, ma tschertgà il discurs u forsa empruvà da midar la decisiun e star anc quai onn ordinari, n’haja nagin fatg. Er il president communal conferma quai. Cura ch’ins scrivia ina tala brev da demissiun en globo saja quai in signal e perquai n’hajan els era betg tschertgà activamain il dialog. Els hajan gia uss annunzias per la cumissiun era sch’els n’hajan betg tschertgà a la gronda, quai mussia che quai dettia persunas che veglian s’engaschar en la cumissiun.

audio
Surpraisa a Mustér – l’entira cumissiun da construcziun va
ord Actualitad dals 04.12.2023. Maletg: RTR
laschar ir. Durada: 5 minutas 46 Secundas.

Cumissiun da bajegiar è ina instanza preparatorica

Las dumondas da bajegiar na vegnian betg ad avair retard, ha il president communal ditg sin la dumonda sche quellas sajan uss bloccadas. La cumissiun da bajegiar saja ina cumissiun preparatorica che tractia las dumondas da bajegiar e dettia la finala ses parairi. Decider decidia lura dentant la suprastanza communala. La cumissiun da bajegiar saja savens en in tschert dilemma – tranter las leschas vertentas, ils giavischs da vart da la politica e da las persunas che veglian bajegiar – e quai na fetschia betg pli simpel la situaziun. Ma uss stoppia la suprastanza ponderar co remplazzar quests quatter posts, in onn avant las elecziuns. Chattar persunas dal fatg e prontas da s’engaschar saja ina gronda sfida, uschia René Epp.

Parsura da l'uffizi da bajegiar ha visà la plazza

Er il parsura da l'uffizi da bajegiar, Marco Tomaschett, ha visà la plazza sin la fin da mars 2024. Quai ha il president communal René Epp confermà sin dumonda. Sur da pussaivlas raschuns n’ha nagin vulì discurrer. La plazza vegnia scritta ora proximamain.

RTR novitads 12:00

Artitgels legids il pli savens