Siglir tar il cuntegn

Header

cuntegn

Mustér Nagina cumissiun parlamentara per sclerir svaris

Al cumenzament da la sesida dal parlament communal è vegnida fatga la proposta per ina ulteriura tractanda, numnadamain d’instradar ina cumissiun parlamentara per sclerir l’abdicaziun da l’entira cumissiun da bajegiar. Suenter ina discussiun animada ha il cusseglier ch’ha gì fatg la proposta retratg sia pretensiun ed il parlament n’ha la finala betg votà sur d’ina cumissiun parlamentara.

L’argument principal è che la cumissiun da gestiun haja da sclerir ils fatgs ed ina cumissiun che tracta la chaussa tanschia. La cumissiun da gestiun, che na survegn normalmain mai il pled tar talas sesidas dal cussegl, ha argumentà ch'ella saja l'instanza da controlla e ch'ella controlleschia per regla ils protocols da la suprastanza communala, dentant uss hajan ins era dumandà per ils protocols da la cumissiun da bajegiar. Uschia vegn la cumissiun da gestiun a sclerir tut en detagl ed alura dar rapport a la suprastanza communala. Lezza vegn sinaquai ad infurmar il parlament communal cun resguardar las reglas da discreziun e da la persunalitad.

Approvà cleramain contract da dretg da bajegiar e servitut

Ina da las tractandas era da conceder il dretg da construcziun e servitut a las pendicularas en connex cun l’ovra solara Desertasol. Quella ovra è vegnida construida avant passa 30 onns e la vischnanca ha surpiglià quella la stad 2022 per ina summa simbolica da 5’000 francs. Uss ha la vischnanca communabel cun las pendicularas da Mustér elavurà in concept per engrondir e renovar ils stabiliments existents.

Planisà è che l’ovra solara produciss annualmain circa 900’000 uras kilowatt electricitad. Cunquai che l’ovra exista gia e la producziun na cuntanscha betg las summas necessarias per ina subvenziun federala è ina procedura da construcziun ordinaria per edifizis ordaifer la zona da construcziun pussaivla. L’idea è che las pendicularas pon duvrar l’energia producida per l’agen diever. Il parlament communal ha approvà la fatschenta senza cuntravusch.

Links Ignaz Venzin, neuer Präsident, Mitte Helga Probst abtretende Präsidentin, rechts Adrian Flepp vice Präsident.
Legenda: Sanester il nov president Ignaz Venzin. Amez la presidenta partenta Helga Probst ed a dretg il nov vicepresident Adrian Flepp. RTR

Nov president e nov vicepresident

Vinavant ha il parlament communal gì d’eleger in president per l’onn proxim. Sco usità han las parlamentarias ed ils parlamentaris elegì il vicepresident da fin qua, Ignaz Venzin, sco president dal cussegl communal per il 2024 e quai cun 14 da 15 vuschs. Er elegì ha il cussegl communal in nov vicepresident. Adrian Flepp ha medemamain survegnì 14 da 15 vuschs pussaivlas. El vegn a presidiar probabel il cussegl communal il 2025, suenter las proximas elecziuns communalas.

RTR novitads 06:00

Artitgels legids il pli savens