Il project da l'ovra solara sin l'Alp Run sur Mustér ha chattà ina partenaria. L'implant sin ina surfatscha da 50 plazzas da ballape duai vegnir realisà ensemen cun las Ovras industrialas da Basilea (IWB). Quai ha la gruppa da project confermà envers la FMR.
La fin da zercladur duain las contractivas da collavuraziun tranter la societad Alp Run Mustér e l'IWB esser sut tetg. Fin l'atun duai lura er la dumonda da bajegiar vegnir inoltrada.
Mustér votescha l'october
Avant che quai è il cas sto la vischnanca da Mustér dentant anc decider da princip sch'ella accepta in tal project gigantic. Mez settember sa fatschenta il cussegl da vischnanca cun la dumonda, l'october lura il pievel.
La finamira da la IWB è d'avair construì l'implant fin la fin dal 2027. Davart ils custs ed er il volumen dal chapital d'aczias fan las ovras da Basilea naginas indicaziuns. Cler è che l'implant sur Mustér duai producir energia electrica per radund 10'000 chasadas e quai surtut durant l'enviern.
Sco l'IWB communitgescha saja l'Alp Run bun adattada per implants photovoltaics. Per l'ina perquai ch'i fissan drizzadas vers sid, plinavant saja la posiziun auta sur 2'000 meters sur mar e la naiv favuraivel per producir electricitad durant l'enviern. Il territori da l’Alp Run cumpiglia ina surfatscha da 7’800’000 m2. Sin 350’000 m2, pia sin 4,5% dal territori, vegnissan montadas ils implants fotovoltaics.
