Il territori da skis da Mustér survegn ina nova attracziun. En il territori da skis vegn construida ina scarsolera d’ina lunghezza d’in kilometer tras il guaud. Strusch che la naiv è davent vegn cumenzà cun las lavurs, las lubientschas èn sin maisa e las empustaziuns fatgas, declera il directur da las pendicularas Stefan Arnold. Planisà è da realisar l’entschatta tar il runal d’entschaviders nua che la scarsolera nova cumenza e finescha. Uschia po l’entir manaschi vegnir manà d’ina persuna, di Arnold.
En tut vegn quai a dar 27 scarsolas che van autonom, l’emprim ensi e lura tras il guaud engiu. Surtut la descensiun tras il guaud datiers da las plantas saja ina attracziun ch’ins na chatta betg tar autras scarsoleras e quai fetschia quella a Mustér fitg attractiva, era sche la lunghezza na saja betg speziala, di Stefan Arnold.
Purschida per l’entir onn
La purschida nova è surtut per dis da malaura, ma era per porscher in'alternativa. Uschia duai la scarsolera esser averta l’entir onn, declera il directur da las pendicularas.
Questa stad duain ils elements prefabritgads d’ina interpresa spezialisada vegnir montads e l’atun duai la purschida nova ir en funcziun. Las lavurs che spetgan èn surtut lavurs manualas e quellas pon sulet vegnir fatgas d’experts per che la segirezza constettia, di Stefan Arnold. «En avegnir vulain nus anc daventar pli attractivs per ils osps da vacanzas ma era per ils indigens», di el.
La tura cun las scarsolas n’è betg integrada en las chartas dal di u da l'onn e nizzegiar ella pon uffants a partir d’ina tscherta grondezza. Per realisar tut investeschan las pendicularas da Mustér en quest project radund dus milliuns francs.
