Punts collian e quai duai era la punt artistica, creada d'Antonino Di Bella, far, colliar la staziun a val da las pendicularas da Mustér cun l’autra vart nua che las garaschas d’autos ed il resort Catrina sa chattan. Dentant ha quella punt era blera simbolica. Uschia declera l’artist che l’idea saja stada da mussar da la monotonia a l’individualitad. Da la vart da las pendicularas ha quai saivs da metal monotonas e tuts che van a far sport d’enviern ed alura maina la punt da l’autra vart, la vart individuala nua che mintgin va puspè da sia via.
La punt Metamorf
Numnà la punt ha Antonino Di Bella «Metamorf». Uschia duai vegnir mussà la metamorfosa dal digital a l'analog, dals fists filigrans a las plattas massivas da atschal-corten. Quai saja en general in da ses materials preferids, l'atschal-corten che fetschia alura cun il temp ruina e midia uschia sia colur, declera Antonino Di Bella. Era ha l’artist vulì mussar ils differents materials sco era las struvas ed las bugliadiras. I saja impurtant da mussar la lavur dal fravi, u en quest cas da la fravia Silvana Levy, per mussar la lavur davostiers e l’artisanadi. Era il patratg da la persistenza è impurtants, uschia vegnan las figuras tagliadas ora da l'atschal-corten d’ina vart da la punt plazzadas sin l’autra mesadad e struvegiads vida pitgas che na fan betg ruina. In cuntrast che croda en egl.
Colliar art cun istorgia
Antonino Di Bella ha realisà a Mustér e conturn gia pliras ovras d’art, surtut bigls. Quels han adina mesiras che correspundan u al lieu u a l’istorgia. Era qua ha l’artist giugà cun las cifras. La lunghezza da la punt è 1'798 centimeters, 1798 è stà l’onn nua ch'ils Franzos han dà fieu al vitg e la claustra da Mustér. Ma era cun l’istorgia da las pendicularas ha la punt da far, ma betg concernend lunghezzas u ladezzas. La punt è vegnida sustegnida da la vischnanca da Mustér cun ina donaziun da 50’000 francs sin il giubileum da 50 onns.
