Siglir tar il cuntegn

Header

cuntegn

Mustér Reducziun da taglia per 10% periclitass investiziuns

La vischnanca da Mustér ha in pe da taglia da 120% da la taglia chantunala simpla. Ina cumissiun ha proponì da sbassar quella per 5% e da far ina examinaziun da la situaziun finanziala en dus onns. Il parlament communal vul dentant reducir il pe da taglia per 10%.

Il president communal, René Epp, na vul betg metter en dumonda la decisiun dal cussegl communal. Cun reducir il pe da taglia per 10% na possia la vischnanca ils proxims onns dentant betg far las investiziuns sco planisà. Quai saja segir ina consequenza sche la populaziun da Mustér accepta la reducziun sin 110% a l’urna. Tge consequenzas concretas che la decisiun ha, na possian ins dentant il mument anc betg dir.

Il mument vegnian ins a discutar la decisiun en suprastanza e lura prender las decisiuns necessarias, di René Epp che presidiescha la vischnanca dapi l’entschatta da l’onn. Tge ch'è dentant schon cler è che la populaziun vegnia a decider en chaussa anc quest onn, probablamain il settember.

Cussegl communal propona reducziun per 10%

Ina cumissiun correspundenta ha proponì ina reducziun da la taglia per 5%. Cun lur arguments n'ha la cumissiun, suenter dus onns lavur, dentant betg pudì persvader. Ord las retschas dal cussegl communal è vegnì proponì da far ina reducziun per 10%. Quai surtut per dar in signal cler ch’ins veglia propi reducir la taglia ed uschia far pli attractiva la vischnanca. La votaziun sur da la proposta è stada clera cun 9 cunter 5 vuschs. Dentant gronda discussiun n’hai betg dà.

Quint 2020 serra cun gudogn

Il parlament ha gì da votar sur dal quint dal 2020. Quel serra cun in surpli d’entradas da radund 86’000 francs tar entradas ed expensas da radund 16,5 milliuns francs. Il grad d’atgna finanziaziun munta a 2,1 milliuns, quai ch’è meglier che budgetà. Il motiv principal saja, ch’ins n’haja betg fatg tut las investiziuns prevedidas en il budget. Cun quest gudogn saja pussaivel da far in deposit a la prefinanziaziun dal center Fontauna cun ina summa dad 1,2 milliuns francs. Il parlament ha approvà il quint 2020 unanimamain.

Plan da finanzas 2021-2030

Il plan da finanzas preschentà saja pli datiers a las expensas realas dals proxims onns. Quel sa basa sin las cifras dals ultims 5 onns e dependa dals resultads effectivs annuals. En il plan da finanzas èsi previs dad investir ils proxims onns 27,7 milliuns francs. Quai è surtut d’attribuir a las investiziuns en il center da sport, che muntan a radund 9 milliuns francs.

Daivet per chau crescha

Il daivet per chau da la populaziun da Mustér vegn a crescher ils proxims onns sin radund 5’000 francs per persuna. Quai ch'è en cumparegliaziun cun autras vischnancas en il chantun fitg aut. Cun las investiziuns planisadas sa reducescha il daivet mo levet. Sco la vischnanca scriva, saja dentant da sperar da cuntanscher en futur in pli aut grad d’atgna finanziaziun.

RTR novitads 06:00

Artitgels legids il pli savens

Scrollar a sanestra Scrollar a dretga