Siglir tar il cuntegn

Surselva Mustér: scumond da far fieu en il liber

Perquai ch'igl è sta bell'aura durant in lung temp pudessan guauds e cultiras pigliar fieu. Per questa raschun ha la suprastanza communala da Mustér decretà in scumond general da far fieu en il liber per l'entir territori da la vischnanca.

Legende: Video Scumond total da far fieu en l'entira vischnanca da Mustér abspielen. Laufzeit 01:59 Minuten.
Or da RTR dals 11.07.2018.

Era ils dis che vegnan resta quai bell’aura. Perquai èsi fitg sitg en guauds, sin prads e pastgiras. Gia in zulprin ch'arda, las sbrinzlas dad in fieu da gril ubain in chametg pudessan dar fieu, e quel pudess sa derasar spert.

Perquai èsi scumandà da far fieu, da bittar davent products da fieu ubain envidaders. Ins na dastga era betg duvrar fuainas. E sco ils pumpiers da Sursassiala scrivan sin lur pagina d'internet, èsi era scumandà da far fieu sin terren privat. I saja dentant lubì da duvrar grils da gas e d'electro.

Persunas che cuntrafan a quest scumond pon vegnir chastiadas. Sch'ils pumpiers ston vegnir sin il plaz, po quai custar passa 1'000 francs; e sch'els ston stizzar in fieu en in guaud u sin ina cultira cun helicopter po quai custar plirs tschientmillis francs.

La situaziun po sa calmar pir suenter plirs dis ch’i ha pluvì. Mo pauca plievgia ubain urizis dad ina u duas uras na pon betg gidar.

RR novitads 09:00