Fin uss survegniva mintga chasada a Mustér in quint pauschal per la taxaziun da l’economisaziun da rument. Cunquai che la summa pauschala n’èra betg vegnida adattada dapi il 1999 na purtava quella summa betg pli ils custs, uschia che la vischnanca aveva fatg in deficit. Per evitar che quel creschia vinavant aveva il parlament communal approvà l’avrigl dal 2022 la midada da taxaziun. Ils quints che las chasadas han uss survegnì procura dentant per discussiuns. Sco il suprastant responsabel Paul Schmidt ha declerà saja quella taxaziun, correspundent a quella da la Surselva, la suletta via per pudair cuvrir ils custs. Uschia sa cumpona la taxa actuala da dus puncts, per l’ina vegn la summa che la regiun metta a quint surdada a las chasadas e per l’autra datti ina taxa communala per pajar il center da rimnada a Raveras.
Regiun Surselva taxescha tenor valita da la chasa
La regiun Surselva quinta sias taxas tenor l'index chantunal da l’Assicuranza da bajetgs. Quel è creschì dapi la crisa da corona per almain 15%, uschia ch’era las taxas sajan augmentadas. Ma qua na possia la vischnanca betg far midads, sche la regiun quinta cun la valita dals bajetgs alura saja quai era prudent da quintar tuttina sin palc communal. Da far uschia la taxaziun recumondia era il chantun e bleras vischnancas en il Grischun ed en Surselva quintian tuttina. Quai muntia che per exempel ina chasa cun ina auta valita e cun paucs abitants paja propi dapli che anc cun il quint pauschal. Quai procuria per dumondas, ma la vischnanca saja sulet il purtader da quella novitad e da principi betg il dretg adressat per la critica, di Paul Schmidt. Ma midar la taxaziun da la regiun, gliez na possia la vischnanca da Mustér betg pretender sco suletta.
Differenzas cun Tujetsch
Differenzas dals quints per l’economisaziun dal rument pon ins era constatar tranter las duas vischnancas vischinas Mustér e Tujetsch. Uschia paja in convischin da Mustér il mument rodund in quart dapli per la dismessa da rument. Quai haja da far cun il fatg che la vischnanca da Mustér haja anc da pajar giu il debit accumulà sin dapli che 150’000 francs ils proxims onns. Alura possia il cussegl communal decider da sbassar la taxa, di Paul Schmidt. Impurtant per l’avegnir saja che la vischnanca vegnia da pajar a la regiun ils quints per la dismessa e betg pli far debits, perquai ch’ina taxa fundamentala stoppia esser equilibrada, pia purtar ils custs e quai n’èra betg pli il cas.
Differenzas tranter il vitg ed ils vischinadis
Il mument paja in tegnairchasa en il vitg da Mustér dapli ch’in tegnairchasa en in vischinadi dapli per la dismessa. Quai haja da far cun quai ch’ils satgs da rument vegnan dismess duas giadas l’emna en il vitg e sulet ina giada en ils vischinadis. Las proximas trais emnas veglian ins perquai testar da rimnar sulet ina giada l’emna ils satgs da rument en il vitg da Mustér, declera Paul Schmidt. Sch’ins vesi ch’ils molocs na vegnian betg emplenids dal tut e ch’ina rimnada tanschia alura vegnia la suprastanza a far sin il proxim onn quella adattaziun, sche betg alura restia quai tar la cifra actuala. Per dapli purschida saja da pajar, pertge la regiun Surselva tschentia il quint al la vischnanca e lezza stoppia mirar ch’ils daners sajan avant maun per pajar quels quints, declera Paul Schmidt.
