Avant l’ustaria dal Cuolm da Vi è ina ritscha cun maisas e bancs. Questa ritscha è serrada giu cun ina binda, ed in placat avertescha ch’i saja scumandà da seser.
Giasts duain surpigliar responsabladad
Sin il placat è scrit ch’i saja scumandà il mument da seser sin terrassas, e ch’ins possia vegnir chastià. Skiunzas e cutgnists enconuschan quest scumond, mo tuttina sesa la glieud giu. Sco il directur da las Pendicularas da Mustér Stefan Arnold di , fetschian els attent a quest scumond e serrian giu maisas e bancs. Els quintian dentant ch’ils giasts surpiglian responsabladad. E sch’insatgi cuntrafetschia a la lescha stoppia el sez savair quai. E la finala na possian els betg metter davent tut las maisas ed ils bancs.
Quests bancs e questas maisas pon ins bain laschar là, e marcar.
Confidenza en las fatschentas
La vischnanca saja obligada da far las controllas necessarias, di il president communal da Mustér René Epp. Mo la finala saja mintgin era responsabel da resguardar las reglas.
La vischnanca ha dentant era ina tscherta confidenza en las fatschentas, ch’i sa tegnan vid las reglas.
Impurtant saja era da laschar reger il saun giudizi, perquai che las pendicularas stoppian purtar in grev burdi finanzial, manegia René Epp.