A l’ur da la citad da Glion – pli precis, sper il bogn avert – ha Glion sias plazzas da sport. Vul dir: la plazza da ballape, la plazza da tennis e dapi da curt ina plazza catramada cun pauca vigur. Questa primavaira ha l’areal Fontanivas, sco quest lieu ha num, dentant survegnì nov schlantsch. I dat ina nova plazza d'ir cun skateboard e dasper in vegl vagun da tren, Quel duai daventar in nov lieu d'inscunter per la giuventetgna. Ed uss è er il pumptrack avert.
Nov pumptrack a Glion
-
Bild 1 von 5. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Quest nov pumptrack ha l'uniun «A Glion» realisà e planisà. Il plaz circular cun undas e stortas per velos e skates ha custà en tut 375'000 francs. La vischnanca ha pajà ina part, il rest ha l'uniun rimnà tar fauturs, sponsurs e tar la populaziun – quai era cun ina finanziaziun collectiva, in uschenumnà crowdfunding.
A l'entschatta era l'idea d'in pumptrack, ma...
Fundà il 2021, s'engascha l'uniun «A Glion» per projects innovativs en ils secturs sport, cultura e temp liber. Ella dumbra radund 20 commembers, surtut famiglias giuvnas da Glion e conturn. Il president, Marco Bracher, declera che l'uniun è en sasez naschida per realisar il pumptrack e per pudair collavurar cun la vischnanca vi da quest project.
Ma l’uniun n’è betg mo sa focussada sin il pumptrack. Uschia organisescha ella er il Städtlilauf ed autras occurrenzas sco «Aktiv a Glion» – in'occurrenza cun excursiuns sportivas e culturalas enturn Glion, declera l’actuara Carla Fischer. La cassiera, Marita Leis-Caduff, accentuescha che l'uniun vul ch’i marschia insatge a Glion e che la glieud vegnia ensemen.
L’idea è ch’i marscha insatge a Glion.
«Igl èn cunzunt babs e mummas giuvnas da Glion e conturn che s’engaschan. E quai è differenta glieud cun differents backgrounds», di il commember da l'uniun e planisader dal project dal Pumptrack, Michael Spescha.
Igl èn cunzunt babs e mummas giuvnas da Glion e conturn che s’engaschan.
Il co-president, Gian Marco Bianchi, animescha novas commembras e commembers da sa participar sch’els han novas ideas u sch’els tschertgan glieud cun medemas ideas. Il president, Marco Bracher, ha gia novas ideas per projects, ma quellas na sajan betg anc madiras per communitgar.
Madir n'è anc nagut, ma i dat intginas ideas ch’èn vegnidas purtadas natiers a nus.
Suenter il grond project dal pumptrack fa l'uniun ina curta pausa, avant ch’i va vinavant cun ses stan al Städtlifest l'entschatta avust.