La vischnanca da Tujetsch ha fatg recurs cunter ils plans per renovar ed adattar la staziun da Sedrun als basegns da persunas cun impediments. Il motiv è che las adattaziuns fatgas da l'Uffizi federal da traffic na correspundan betg pli a l’idea da la vischnanca. Uschia fiss il surpassadi vegnì memia grond ed era memia lad, di il president da vischnanca, Beat Röschlin.
Sutpassadi è pli adattà
Sco il president da vischnanca ha ditg, saja la varianta – probabel la pli adattada – quella cun in sutpassadi. Era sche la varianta cun in surpassadi fiss pli favuraivla, saja in sutpassadi probabel il meglier per tuts.
Vischins han ramassà suttascripziuns
Parallel cun il recurs da la vischnanca ha quai era dà resistenza davart da la populaziun. Uschia han vischinas e vischins rimnà suttascripziuns per in'iniziativa. Quella pretendeva da renunziar al surpassadi, ma era da reglar il traffic plaun en vischnanca. Tenor Beat Röschlin saja l’iniziativa d’ina vart anc actuala, uschia che la vischnanca saja era interessada da reglar il traffic plaun davent da la staziun en tuttas direcziuns.
Matterhorn-Gotthard vul far propostas
La viafier Matterhorn-Gotthard sto uss far propostas, co realisar la lescha per l’egualitad da persunas cun impediments. Quella possia vegnir ademplida cun pliras variantas, ha ditg il pledader da la MGB, Jan Bärwalde. Il mument sajan ins vi dad elavurar las variantas e lura vegnian ins a preschentar las propostas a tut ils pertutgads. La finala vegnia l’Uffizi federal da traffic a decider davart las variantas. Dasper in surpassadi ed in sutpassadi, dettia quai dentant era anc autras pussaivladads, ha Bärwalde accentuà.
RR actualitad 17:00
