Avant in pèr mais han pliras spendreras da l'ospital regiunal Surselva demissiunà. Ina media saja crudada ora per in pli lung temp ed in'autra media saja ussa era crudada ora temporarmain, uschia che la partiziun da l'assistenza a la naschientscha sto serrar las portas per quatter dis.
Nus na pudain betg cuvrir ils servetschs uschia.
L'ospital regiunal haja infurmà auters ospitals sco era las dunnas pertutgadas davart quest pass. Daco ch'ins serra gist ussa n'haja da far nagut cun il dis da festa, di Fadri Bisatz. Ins haja pudì calcular ils termins approximativs da las dunnas ed i na dettia durant quels dis presumablamain nagins termins da naschientscha. Ma quai pudess era vegnir auter, uschia ch'ins stoppia pudair reagir.
Era sch'ins haja chattà novas spendreras hajan ins vinavant rusnas tar il persunal. E quai betg mo tar la partiziun d'assistenza a la naschientscha. En l'entir ospital dettia mancanza da persunal.
Mo perquai che nus vulain quai, na vul quai betg dir che nus vegnin da far vegnir il persunal qua.
Las sfidas da l'avegnir èn da survegnir avunda persunal sco era d'avair in ospital ch'ins vegnia da pajar.
