Fadri Enrico Bisatz haja ina vasta furmaziun e gronda experientscha da manar en differents secturs da l'ospital, scriva il cussegl d'administraziun en ina communicaziun.
La scolaziun da basa ha el fatg al spezialist da tgira cun nivel da diplom II. Quella ha el fatg al Center da furmaziun per la sanadad ed ils fatgs socials a Cuira. Suenter ha el lavurà sco spezialist da tgira diplomà en la chirurgia generala. Il 2008 è Bisatz daventà manader da staziun en l'urologia da l'Ospital chantunal dal Grischun. Il 2012 ha el midà en la partiziun da codaziun ed ha absolvì l'examen federal professiunal al codader medicinal.
Sco manader da team dal controlling medicinal e sco vicemanader da l'administraziun da pazientas e pazients è el stà responsabel per il svilup dal controlling medicinal staziunar ed ambulant. Durant quest temp ha el terminà cun success il studi da «Master of Advanced Studies in Business Administration» a la Scola auta spezialisada dal Grischun. Suenter è el daventà manader da la partiziun da controlling e da codaziun e vicemanader da l'administraziun da pazientas e pazients a l'Ospital chantunal dal Grischun e lavura anc oz en questa funcziun.
Bisatz è maridà ed è bab da dus uffants.
Käch va en pensiun anticipada
Sia antecessura Claudia Käch va anticipadamain en pensiun. Ella ha manà l'ospital a Glion dapi il 2018. Il november da l'onn passà ha Käch declerà ch'ella haja gia daditg ponderà dad ir en pensiun pli ad ura. Quai suenter ina vita da lavur fitg intensiva.
