La radunanza communala da Trin ha approvà mardi saira in credit da 400'000 francs per in project da concessiun per l'ovra electrica Pintrun. La concessiun da l’ovra electrica scroda il november 2024 – suenter ina durada dad 80 onns. Perquai tschertga la vischnanca ina nova schliaziun.
Suenter che la concessiun scada va en vigur l'uschenumnà «Heimfall» u «return a tschep». Tenor la lescha davart il dretg da las auas vegn in'ovra idraulica suenter la scadenza da la concessiun transferida a la communitad che surdat la concessiun.
En ina proxima etappa vul la vischnanca evaluar las pussaivladads. Ina varianta saja che la vischnanca sezza saja la gestiunaria. In'autra varianta saja, da crear ina nova firma cun participaziun da maioritad dal maun public. Tenor la missiva quinta la vischnanca che la populaziun vegn a pudair votar davart il futur da l'ovra electrica l'emprima mesadad dal 2024.
Il chantun vul il pled en chapitel «Heimfall»
Sco ina da las emprimas vischnancas en il Grischun vul Trin prender enavos ina Ovra electrica. A partir dal 2035 scadan bleras concessiuns d’ovras idraulicas en Grischun. Il chantun vul prender las mastrinas enta maun. Cun 107 vuschs e senza cuntravuschs ha il Cussegl grond il favrer prendì enconuschientscha da la strategia da la regenza.
