Cun 107 vuschs e senza cuntravuschs ha il Cussegl grond prendì enconuschientscha da la strategia da la regenza.
Cussegl grond pretenda precisiuns
Malgrà bler laud per la regenza, ha il Cussegl grond era plazzà ina decleranza areguard la strategia. I sa tracta d'ina precisiun da la strategia che cuntegna quests puncts:
- porscher plazzas en regiuns cun forza idraulica,
- mantegnair u engrondir las ovras existentas,
- bajegiar novas ovras, nua ch'i fa senn
- buna collavuraziun cun Repower ed enclegientscha cun las ovras electricas da Turitg.
Il glindesdi avevan tuttas partidas ludà la strategia da la regenza. En la debatta d'entrada han singuls deputads dentant era fatg attent ch'ils dretgs d'aua appartegnan a las vischnancas. Lezzas dettian las concessiuns a las ovras ed il chantun lubeschia quellas. Gliez duai restar uschia, èsi vegnì punctuà en plirs votums.
Per tge vai?
Il rapport porta il titel «Strategia chantunala concernent la forza idraulica». El sa fatschenta cunzunt cun l’uschenumnà «Heimfall». Tenor la lescha davart il dretg da las auas vegn in'ovra idraulica suenter la scadenza da la concessiun transferida a la communitad che surdat la concessiun. Il Grischun e las vischnancas da concessiun «survegnan uschia in portfolio d'ovras electricas», scriva la regenza. Tranter ils 2035 ed il 2050 scadan concessiuns dad ovras che produceschan 70% dal current en il Grischun. Societads da la Bassa possedan ina gronda part da questas ovras.
Prender las mastrinas enta maun
La regenza less nizzegiar questa schanza cun suandanta strategia ch’ella recumonda era a las vischnancas:
- Il chantun (e las vischnancas) sa participeschan pli ferm vi da las ovras.
- Ils gudogns – «valurisaziun» – e las plazzas restan en il chantun.
Per cuntanscher dapli pussanza sin il martgà d’energia e per salvar plazzas da lavur en il chantun propona la regenza:
- Stgaffir ina societad che venda l’energia dad ovras grischunas.
- Stgaffir in biro d’inschigneras e da spezialists en il chantun, che porscha servetschs fitg qualifitgads a las ovras idraulicas.
500 plazzas da lavur porschan las ovras idraulicas da preschent en il Grischun. Lavurs che pretendan auta qualificaziun èn ils ultims onns dentant vegnidas exequidas savens da firmas da la Bassa.
Damain dependenza
Il Grischun daventia cun questa strategia main dependent dals tschains d’aua, scriva la regenza. La «Strategia concernent la forza idraulica 2022 fin 2050» rinforzia era la segirezza dal provediment d’energia da las proximas generaziuns.
