Las Ovras Zervreila SA han inoltrà la dumonda da concessiun per realisar il project «Conduct da transmissiun Lumnezia». La dumonda è stada publitgada il venderdi passà en il «Fegl ufficial Surselva» e pertutga 10 vischnancas da concessiun da Panaduz enfin Glion e Lumnezia. Ina surpraisa n'è la dumonda da concessiun betg, essend che las Ovras Zervreila SA avevan gia annunzià la stad passada da lantschar danovamain il project.
Il project che preveda da tschiffar l’aua entadim la Lumnezia e manar ella via conduct tras il culm al pe dal lai da Zervreila sin l'intschess da Val S. Pieder. Là duess l’aua lumneziana vegnir turbinada direct - ubain pumpada siadora en il lai da Zervreila. Ina investiziun da circa 140 milliuns francs, sco quai che las ovras avevan infurmà gia la stad 2025.
Proxima runda
Igl è la segunda runda per ina dumonda da concessiun che las Ovras da Zervreila lantscheschan per tschiffar l’aua entadim la Lumnezia. L’emprima dumonda datescha dal 2012 ed era vegnida concedida dal chantun e da las vischnancas pertutgadas. Franà quella dumonda aveva la finfinala il Tribunal federal ch'ha dà suatientscha ad in recurs da las organisaziuns grischunas per la protecziun da la natira e da l'Uniun da pestga naziunala.
Sche las organisaziuns per la protecziun da la natira inoltreschan danovamain in recurs sin questa segunda dumonda da concessiun è per il mument anc avert. Sco quai che Anita Mazzetta, la mainafatschenta dal WWF Grischun, ha dà d’entellir envers la FMR, hajan las organisaziuns per la protecziun da l'ambient gist prendì enconuschientscha da la nova dumonda da concessiun. «Per il mument na pudain nus anc betg dir insatge pli concret.» Temp per plazzar in recurs han las organisaziuns enfin ils 20 da favrer 2026 e quai tar il departament per infrastructura, energia e mobilitad dal chantun Grischun.
Contractivas tranter las Ovras da Zervreila SA e las organisaziuns per la protecziun da la natira pertutgant il project lumnezian n'hai betg dà, sco quai che Anita Mazzetta di: «Nus essan sulet vegnids informads da las ovras.» Contractivas cun quellas organisaziuns aveva il mainafatschenta da las ovras da Zervreila, Clemens Hasler, gì annunzià la stad passada envers la Südostschweiz per chattar in consens en chaussa. Sco quai ch'i para, han ins da la vart da las ovras desistì da contrahar. Quai ha Clemens Hasler ditg a la FMR e gist argumentà: «Nus essan persvas d'avair ademplì cun la nova dumonda da concessiun las pretensiuns dal Tribunal federal.»
Naginas contractivas
Il mainagestiun da las Ovras da Zervreila ha menziunà ils 7 milliuns francs previs per augmentar e proteger ils guauds dad ogna perlung il Glogn. El è da l'opiniun che las organisaziuns per la protecziun da la natira veglian impedir l'entir project, uschia ch’i n'avessia era fatg pauc senn da contrahar. Desistan las organisaziuns da recurrer encunter la nova dumonda da concessiun, lura n'èsi tuttavia betg segir che las tschiffadas entadim la Lumnezia vegnian realisadas.
Senza sustegn finanzial da Berna na vai era betg
L'entir project dovra numnadamain sustegn finanzial da la Confederaziun per che las investiziuns sa paghian. Prendì il cas che la Confederaziun sustegna finanzialmain il conduct da transmissiun Lumnezia cun daners previs per la strategia d’energia federala, lura na dastgan las Ovras da Zervreila durant 10 onns betg pajar tschains d’aua. Sco quai ch’il president da la vischnanca Lumnezia Daniel Solér ha ditg, ha la vischnanca la pussaivladad da sa participar a la nova interpresa previsa aposta per il conduct da transmissiun. Per uschia segirar ils daners che la vischnanca ha dabun, sch’il conduct vegn tuttina in di realisà. Finanzialmain profitescha la vischnanca Lumnezia sco vischnanca da concessiun il pli fitg dal conduct da transmissiun che maina l’aua lumneziana al pe dal lai da Zervreila.
Electricitad versus flum selvadi
Tenor las indicaziuns da las Ovras Zervreila SA pudess la producziun d’electricitad grazia a la aua da Vrin vegnir augmentada per 80 GWh. Quai tanscha per cuvrir il diever da bun 18'000 chasadas. L’ovra fa era valair d’augmentar considerablamain il provediment d’electricitad entadim la Lumnezia cun construir a prà cun il conduct d’aua ina lingia per current electric che furnescha electricitad a Vrin e Lumbrein.
Il WWF Grischun punctuescha ch'il Glogn saja in dals sulets flums libers che culan en Surselva en il Rain. Almain sin ses tschancun entadim la Lumnezia enfin là, nua ch’il Rain da Val sbucca en il Glogn. L’aua dal Rain da Val vegn gia nizzegiada da las Ovras da Zervreila. Il WWF fa attent sin sia pagina ch’i valia la paina da mantegnair in dals davos flums selvadis en Surselva ed annunzia dad esser promt da batter per quai flum era pervia dals guauds dad ogna che sa chattan en l'intschess dal Glogn.