Las Ovras electricas Zervreila KWZ han preschentà a la radunanza communala da la vischnanca Lumnezia il project «Conduct Lumnezia». 43 votantas e votants sco era quatter osps han fatg part a la preschentaziun.
Il project prevesa d'engrondir ils implants idraulics existents senza construir novas ovras electricas. Empè da quai duain vegnir construidas tschintg tschiffadas d'aua sin l'intschess dal Glogn per manar ulteriuras quantitads d'aua en il lai da gulivaziun existent a Zervreila.
Tras ina gallaria da 13 kilometers duai l'aura vegnir duvrada sco aua currenta u duvrada sco reserva da producziun.
Cun quest project vulan las Ovras electricas Zervreila augmentar la producziun d'electricitad per 80 uras gigawat, quai correspundia circa al consum d'electricitad da 18'000 chasadas. La segirezza dal provediment per Vrin e Lumbrein vegn meglierada cun construir in segund conduct d'affluenza.
Gudogn per il Glogn ed otg vischnancas
Element central dal project è era la revitalisaziun da las regiuns umidas dal Glogn. La valita da las zonas umidas d'impurtanza naziunala duai uschia vegnir augmentada.
La KWZ argumentescha ch'il project saja equilibrà tant ecologicamain sco era economicamain. Las investiziuns muntan a 138,8 milliuns francs.
Mintg'onn vegnan radund 1,4 milliuns francs ad ir al maun public en furma da tschains d'aua e taglias. Las otg vischnancas da concessiun profiteschan ultra da quai da l'energia da concessiun.
Project en in stadi avanzà
La dumonda da concessiun è gia vegnida inoltrada e sa chatta en la procedura d'approvaziun. L'exposiziun publica è planisada per l'october/november 2025. La KWZ spetga l'approvaziun definitiva per l'atun 2025.
Actualmain han lieu discussiuns intensivas tranter las vischnancas, las Ovras electricas Zervreila ed ils represchentants da las vischnancas concernent l'energia da concessiun ed ils tschains d'aua en connex cun la contribuziun d'investiziun tenor l'artitgel 26 da la Lescha d'energia dals 30 da settember 2016.
Decisiuns da la radunonza communala
Sper la preschentaziun dal project d'engrondir ils implants idraulics existents èsi era vegnì votà davart ulteriurs projects planisads:
- La radunonza communala ha decidì cun gronda maioritad e be ina cuntravusch d'approvà la revisiun parziala da l'engrondiment da la plazza da ballape en il vischinadi da Vella.
- Plinavant è vegnì approvà unanimamain il project per l'engrondiment dal spazi da magasinar a Davos Munts, en il vischinadi da Degen. Vitiers è vegnì concedì il credit da CHF 520'000.