Tant Flem sco era la Lumnezia din Na a la prolungaziun da la concessiun cun las Ovras idraulicas Zervreila. Quai cleramain cun 838 vuschs encunter a Flem (137 persunas èn stads per la prolungaziun) e 507 vuschs en Lumnezia (198 persunas per ina prolungaziun).
Cun quest resultat suondan las duas vischnancas la recumandaziun da la Cumissiun da las vischnancas concessiunarias da las ovras idraulicas Zervreila. Tenor lezza possian las vischnancas uschia contrahar da nov in'eventuala concessiun en l'avegnir.
Tschintg ulteriuras vischnancas han gia decidì
Las radunanzas communalas da Stussavgia, Sagogn, Tumein, Trin e Val han gia decidì l'onn passà davart la fatschenta. Quai cun acceptar la proposta da la Corporaziun da las vischnancas concessiunarias da las ovras idraulicas Zervreila e dal chantun da betg prolungar la concessiun gia uss. Panaduz, Glion e Schluein suondan en il decurs da l'onn las votaziuns davart la concessiun.
Betg prolungar per pudair avair pliras opziuns
Refusar la dumonda muntia che las vischnancas hajan pliras opziuns en l'avegnir, uschia il president da la corporaziun Stefan Schmid.
Quai n'è betg la resposta ch'ins veglia surpigliar ils indrizs idraulics. Teoreticamain pon ins lavurar vinavant cun ils medems partenaris, ma ins po era dumandar autras offertas.
Questa resposta negativa na muntia betg, che las vischnancas na veglian betg lavurar cun las producentas d'electricitad ch'èn las acziunarias da maioritad da l'interpresa Ovras idraulicas Zervreila. Quai fissan par exempel la SN Energie AG u l'Axpo. I giaja en emprima lingia da rinforzar la posiziun da las vischnancas e dal chantun.
Actualmain possedan las vischnancas concessiunarias ed il chantun ensemen 28% dal chapital d'aczias da las Ovras idraulicas Zervreila. Quella participaziun saja in zic pli auta ch'usità, perquai che las vischnancas avevan desistì l'onn 2008 dal dretg da recumpra. Questa participaziun pudess en l'avegnir daventar pli gronda. Ina collavuraziun cun las acziunarias actualas na saja betg exclusa, manegia Stefan Schmid. Ina participaziun al chapital haja avantatgs en cumparegliaziun cun il tschains d'aua che las vischnancas survegnan entras la concessiun.
Cun l'energia da participaziun han ins il maun sin la vendita da l'energia e po uschia gudagnar insatge.
Suenter l'onn 2037 pudessan las vischnancas u surpigliar ils indrizs idraulics, tge che fiss l'uschenumnà «Heimfall» – ubain ch'ellas pudessan danovamain martgadar cun las producentas d'electricitad.
Votaziuns davart midadas dals statuts
Las vischnancas concessiunarias Flem, Glion, Lumnezia, Panaduz, Sagogn, Schluein, Trin, Tumein, Val e Stussavgia han era da decider davart ina midada dals statuts. Flem, Glion, Panaduz, Val e Lumnezia acceptan la midada, ils resultats da las ulteriuras vischnancas n'èn anc betg enconuschents. Nov dastgan pliras persunas da la medema vischnanca far par a la suprastanza.
En suprastanza da la Corporaziun da las vischnancas concessiunarias da las ovras electricas Zervreila dastgavan fin uss be in commember esser da la medema vischnanca. Pervi da las fusiuns è il dumber da vischnancas dentant sa diminuì da 22 sin 10. Uschia saja stà ina sfida da chattar suprastants e suprastantas.
Avant bun quatter onns avevan las Ovras idraulicas Zervreila dumandà las vischnancas concessiunarias da prolungar la concessiun che scada l'onn 2037.