La concurrenza per il «Parc da vent Lumnezia» sa numna «Energia Lumnezia SA». La nova societad fundada dacurt è sa distatgada da la «Parc da Vent SA» e vul ussa realisar en atgna reschia, in parc da vent. E quai gist en il medem lieu, numnadamain sin l'alp Cavel, en Lumnezia.
La societad veglia
Guido Schönenberger, possessur da la Parc da vent Lumnezia SA, na fa betg part da la nova societad. El pretenda en ses prospect repartì dacurt, ch'el saja il possessur da las indemnisaziuns (daners) da cuvrir ils custs da furniziun, pia da l'uschenumnada KEV. Per questa raschun sappia mo el realisar quai parc en quella regiun.
La societad nova
Ils possessurs da la nova societad, la Energia Lumnezia SA, èn d'ina autra opiniun. Kurt Mägeli, il tecnicist e spezialist da rodas da vent, manegia che las indemnisaziuns da la KEV tutgan a quels che sappian realisar il parc da vent e quai sajan els.
Tar la nova societad tutga numnadamain Franz Miedeck che furnescha las turbinas per las rodas da vent e Peter Kelemen, l'inventader da la tur construida cun giatter che porta las turbinas. Cun Jörg Senn fa perfin il constructur da quella tur da giatter part da la nova firma. Tgi che survegn raschun e la finala las contribuziuns da la KEV, n'è betg sclerì. Guardond enavos sin l'andament da l’entira procedura, che cuzza ussa bunamain 10 onns, san ins supponer che quai daventa in cas giuridic.
RR actualitad 12:00
