Il 2019 ha la jugend.gr, l’uniun che vul promover la participaziun d’uffants e giuvenils en las vischnancas grischunas cumenzà in project cun 13 vischnancas per promover la participaziun. Era sa participada a quest project è la giuventetgna Cadi, la lavur da giuventetgna da las 5 vischnancas en la Cadi. Per il president da quella Daniel Schmid è la fin dal project era la schanza da mirar sin ils resultats. Surtut il carnet da duers elavurà en connex cun il project duai gidar a las suprastanzas communalas en la Cadi da promover la lavur da giuventetgna, accentuescha Daniel Schmid. In da quels puncts en quai carnet da duer è da far inscunters regulars cun ils uffants e la giuventetgna per pudair tadlar lur giavischs e basegns.
Local per giuventetgna
Ord da quels discurs è sa cristallisà a Tujetsch che la giuventetgna sur 16 onns n’ha betg in local da sentupada. Perquai ha la vischnanca surpiglià ina chasa che vegnida duvrada blers onns per la producziun d’energia amez vischnanca. En ina radunanza da vischnanca è vegnì decis da dar in credit da 550’000 francs per realisar in local da giuventetgna cun abitaziuns per emprendists. Surtut l’engaschi da la giuventetgna per questa soluziun ed er il votum durant la radunanza da vischnanca ha fatg impressiun al suprastant Daniel Schmid. Per el mussa quai che la giuventetgna vul s’engaschar e quai è il pli impurtant.
Jugend.gr cuntents cun il project
Jugend.gr ha lantschà il project il 2019 cun 13 vischnancas e la finala terminà quel anc cun 10. Per Flurina Spreiter la responsabla per las vischnancas Sursilvanas en quest project èsi impurtant ch’ils uffants ed ils giuvenils vegnan prendids serius. Era uffants han in dretg da pudair sa participar a la vita en in vitg ed era al svilup, pli baud ch’els survegnan ina vusch e pli colliads vegnan els cun ina communitad. Quai è in avantatg alura per la vischnanca perquai ch’ils uffants e giuvenils vulan alura, el cas ideal, era s’engaschar en lur vischnanca, uschia Flurina Sprieter. Il project è uss terminà e las vischnancas han in instrument co promover la participaziun d’uffants e giuvenils en lur vischnanca e quai è impurtant.
