L’incumbensa da rumir la naiv sin il Lucmagn vegn mintgamai surdada per diesch onns. L'atun 2020 cumenza ina nova perioda fin il 2029. La gievgia passada ha la radunanza da la Pro Lucmagn ditg ch’ins veglia surdar l’incumbensa a la cuminanza Edelweiss che consista da duas interpresas dal Tessin: Impresa costruzioni Madaschi Corrado da Blinzuna e Bassi Alfredo Sagl, Risanamento Strade d'Airolo.
«Offerta dad Edelweiss betg seriusa»
La cuminanza da lavur Pro Lucmagn, che consista da la Berther Construcziun da Mustér e la Scaresa SA da Blenio ha decis da far recurs cunter questa surdada. Sco il cumpossessur da l’interpresa Berther, Placi Flepp ha ditg envers l’Agentura da Novitads Rumantscha na saja l’offerta dad Edelweiss simplamain betg seriusa perquai che Edelweiss n’adempleschia betg ils criteris per las lavurs. Tenor el stoppia la procedura vegnir annullada. La Pro Lucmagn exequescha il servetsch d'enviern dapli l'entschatta ch'il pass è avert l'enviern. La rumida na saja betg adina simpla e pretendia surtut era flexibladad, saja quai dal persunal sco er da las maschinas.
Enfin la fin da l'onn duai ina decisiun da la dretgira esser avant maun.
Ord l'archiv
Il Pass dal Lucmagn collia il Grischun cun il Tessin e la Val Medel cun la Val dal Blegn. El è gia da vegl ennà in impurtant pass per traversar las Alps.
RR novitads 06:00