I saja ì sco da baiver aua da rimnar las suttascripziuns, ha ditg Claudio Cadruvi in dals petiziunaris. La petiziun cun las 490 suttascripziuns, ch'è vegnida surdada oz a la presidenta da la vischnanca da Glion, giavischa che l'uffizi da bajegiar vegnia prendida sut la marella.
La presidenta communala Carmelia Maissen è d'ina vart surstada da la petiziun, els survegnian numnadamain era buns resuns, ed en ils ultims quatter onn n'haja nagin tratg vinavant ina lubientscha da bajegiar a la dretgira administrativa. Da l'autra vart è ella er pertscharta che bajegiar è ina chaussa fitg emoziunala.
Nus prendain quai sco schanza d’entrar en in dialog constructiv, sco schanza da mussar si las proceduras e d'instradar mesiras là nua ch'igl è pussibel e fa senn.
L'idea saja en in'emprim pass da prender encunter la petiziun ed analisar il cuntegn. L'idea saja dentant er da far ina maisa rodunda cun ils petiziunaris, per uschia guardar pli exact sin ils differents puncts. La suprastanza da Glion ha uss en tutta cas trais mais peda da prender posiziun en chaussa.
Pretensiuns da la petiziun
- Realisar la lescha da bajegiar senza opiniuns persunalas
- Surpigliar responsabladad ed agir lasuenter
- Mo en cas urgents involver cussegliaders ed auters uffizis
- Betg simplamain acceptar decisiuns e propostas da cussegliaders ed auters uffizis, mabain s’engaschar per la populaziun
- Critica envers architectura è da tralaschar e da prender decisiuns objectivas tenor la lescha
