Chattar glieud per ina suprastanza è ina sfida, surtut per ina pitschna plaiv sco quella da Pitasch. La presidenta, Rita Caviezel, ha pledentà pliras persunas che vegnissan en dumonda per il post. Plinavant haja ella scrit ina brev ha tut las commembers e commembers da la Plaiv per far attents els da la situaziun ed era per demussar tge ch'i muntass per la plaiv sch'ella n'ha vess betg pli avunda glieud per furmar ina suprastanza. Tut quai ha ella fatg adumbatten, nagins candidats èn s'annunziads. Uschia ha ella dà giu il post en la radunanza dals 19 d'avrigl 2023. L'actuara e la responsabla per la finanzas han demissiunà, perquai che la plaiv n'ha betg pudì furmar ina suprastanza cumpletta.
La suprastanza è in visavi per il plevon ed uss vegn quel ad esser in curatur.
Nagina fusiun
La Plaiv refurmada da Pitasch è commembra da la pastoraziun Luven, Flond, Pitasch e Duvin. Ina fusiun tranter las quatter plaivs è en ils davos onns adina puspè stà in tema, ma cura che la Plaiv da Pitasch haja dumandà da pudair fusiunar, hajan tschellas plaivs dà ina resposta negativa, uschia Rita Caviezel. Enfin che las plaivs hajan anc suprastantas e suprastants emprovian ellas da restar independentas.
En la cuminanza da pastoraziun avain nus gia dapi in mument discutà da fusiunar. Uss ch'i fiss stà uschè lunsch, han tschellas plaivs betg vulì.
Per consequenza sto la Baselgia evangelica refurmada dal Grischun installar in curatur per administrar las fatschentas da la plaiv. Uschia è la Plaiv da Pitasch suenter la Plaiv da Castrisch la segunda plaiv refurmada en la Foppa ch'è sut la tutela da la Baselgia Chantunala. Lezza ha uss da decider sur dals proxims pass.
