La suprastanza da la vischnanca da Sumvitg ha orientà davart la proposta da la revisiun da la planisaziun locala. Tenor communicaziun vegnia quella inoltrada a l’Uffizi per il svilup dal territori per la pre-examinaziun.
Agir activamain cunter la mancanza d’abitaziuns
En vista a la mancanza d’abitaziuns haja la suprastanza definì ina zona per abitaziuns en vischinanza da la staziun da la Viafier retica a Rabius. I sa tractia d'abitaziuns per persunal stagiunal e persunal che lavuria sur onn en ils secturs da commerzi, turissem e sanadad. Per sa sviluppar en il sectur turistic haja la suprastanza er definì ina zona per abitaziuns administradas a Sumvitg/Plaun.
La suprastanza communala vegn a terminar en il decurs da las proximas emnas la lavur ed inoltrar la proposta da la revisiun, che cuntegn ils plans revedids da la lescha da bajegiar revedida ed il rapport correspundent.
