En Tujetsch vegnan ils gremis communals elegids. En suprastanza sa retiran il president Beat Roeschlin ed il suprastant Mario Hitz. Sin dumonda da la FMR, la Fundaziun medias rumantschas, ha Martin Cavegn (50) declerà ch'el stettia a disposiziun sco successur da Roeschlin, pia sco president communal da Tujetsch. Ponderaziuns per candidar fa era Silvio Schmid. Il vicepresident, Renato Decurtins na vul dentant betg daventar president.
L'entira cumissiun da gestiun demissiunescha
En il cussegl da vischnanca sa retiran Gelgia Deplaz e Severino Solèr. E l’entira cumissiun da gestiun demissiunescha, cun Tumaisch Valier, Primus Deragisch e Baseli Huonder.
Fin ils 28 da favrer pon ins inoltrar propostas per candidats. L’emprim scrutini da las elecziuns en Tujetsch è ils 19 d’avrigl 2020, il segund ils 7 da zercladur.
Midadas cun la constituziun communala
Avant ch'eleger ils gremis communals ston Tuatschinas e Tuatschins votar sur da la revisiun da la constituziun communala. Quella preveda tranter auter ch’il temp d’uffizi na vegn betg limità. La nova perioda d’uffizi duai cuzzar quatter onns. Plinavant vegn il cussegl da scola reducì da tschintg a trais commembers. Il commember da suprastanza ch'ha il departament da scola presidiescha il cussegl da scola. Quest cussegl sco era la cumissiun da gestiun na dovran betg pli suppleants. In cusseglier da vischnanca po era far part da la cumissiun da gestiun.
E la finala vegnan duas cumissiuns abolidas: La cumissiun Bogn Sedrun e la cumissiun museum. Ils 5 d’avrigl 2020 decidan votantas e votants a l’urna sur da la nova constituziun communala.
RTR novitads 06:00
