Arno Capaul e sia dunna Priska èn purs da bio e dapi tschintg onns han els in giagliner cun 2'000 giaglinas. Els vendan lur ovs sin lur bain puril e furneschan la gronda part dals ovs ha la firma Hosberg che distribuescha vinavant il product. Ils ovs d'Andiast chattan uschia la via tar Aldi Suisse en las stizuns.
Quai che ti pavlas a la giaglina va direct en l'ov.
Il pavel fa il gust da l'ov, di Arno Capaul. E quest pavel consista da dumiec, tirc ed er soja. Il soja, pia il protein, dat il gust a l'ov e fa che l'excrement resta stagn. Quest e impurtant, perquai che ovs tschufs na pon ins betg vender sco ovs d'emprima qualitad. Arno Capaul ha ina maschaida da pavel cun in zichel origano per sustegnair la digestiun da las giaglinas.
Er la colur dal mellen da l'ov vegn influenzada cun il pavel. Per far vegnir pli stgirs il mellen da l'ov, agiunschan ils producents per exempel paprica ni safran. Quest n'ha betg ina influenza sin il gust e la colur dal mellen d'ov na di era nagut sur da la qualitad d'in ov.
Nus essan disads ch'il mellen d'ov è pli stgir, ma la colur n'ha betg da far cun la qualitad.
Las giaglinas da bio han normalmain la pussaivladad d'esser or en il liber, ma cun la grippa d'utschels è quai scumandà. Ils animals èn actualmain sin in pli pitschen spazi ed els na pon betg stgavar il plaun. Uschia è la ristga pli gronda ch'ils animals cumenzan a piclar in l'auter. Sche giaglinas vesan sang vi d'in auter animal piclan ellas. Quest è ina furma da cannibalissem.
La giaglina è in animal ch'è adina vi da stgavar e far insatge.
Las giaglinas d'Anton Capaul èn tratgas spezialmain per metter ovs. En in onn metta ina giaglina enfin 320 onns, tge che munta ch'ella è in animal d'auta prestaziun, e cunquai sensibla. Cun il temps mettan ellas ovs cun crosa pli fina, uschia ch'ellas ston vegnir remplazzadas suenter in onn enfin quindesch mais. Alura daventan ellas sco product final «giaglinas da schuppa».
