Era in animal po tuttenina midar ses cumportament. Sch'il veterinari u la veterinaria na po betg gidar vinavant, pudess quai er esser che l'animal ha in problem psichic. Lura po ina psicologa u in psicolog d'animals gidar.
Anna Maria Columberg-Schnoz è dapi varga 10 onns psicologa d'animals. Ella è sa spezialisada sin chauns, giats e chavals, ma animals da niz tutgan magari tar ses pazients. Sper la psicologia ha ella fatg divers curs, tranter auter sco omeopata e trenadra da chauns.
In animal mussia savens ses problems psichics cun midar il cumportament, di la psicologa. Quai po per exempel esser il cas, sch'in giat na fa betg pli en tualetta u sch'in chaun è tuttenina agressiv. Avant che tschertgar in problem en la psica saja dentant l'emprim pass adina tar il veterinari u la veterinaria. Ma sche lez na possia era betg gidar, po la psicologa empruvar da tschertgar il problem. Blers animals surprendian er il cumportament dal patrun u la patruna u reageschan sin ina midada dal conturn, di Anna Maria Columberg-Schnoz.
Communicaziun cun l'animal
En sias terapias fa Anna Maria Columberg-Schnoz il pli savens la communicaziun cun l'animal. Per quai prenda ella si contact cun l'animal sur ina fotografia ed emprova uschia d'eruir tge ch'è il problem. Sco quai po funcziunar pudais Vus tadlar qua:
