Radunanza da la UGCP 2025 - Il caliber 7 mm divida ina giada dapli ils chatschaders

Var 180 delegadas e delegads èn s'inscuntrads a Breil per discutar e decider davart ils divers temas che preocuppan. Las delegadas e delegads han acceptà tut las tractandas proponidas da la suprastanza. La radunanza ha approvà il quint annual 2024 e prendì enconuschientscha dal preventiv 2026. La bilantscha per ils 31 da december 2024 mussa ina perdita da CHF 24'930 per l’uniun e CHF 13'100 francs per la cumissiun per la scolaziun ed il perfecziunament dals chatschaders e da las chatschadras.

Impressiuns da la radunanza

Las propostas da la suprastanza centrala han chattà l'approvaziun cumplaina, las moziuns da las secziuns dentant betg tuttas. Uschia han las delegadas ed ils delegads acceptà unanimamain la revisiun parziala da l'ordinaziun davart ils chauns da chatscha - ina proposta da las secziuns Mantogna Dadora e Raschil.

Anc adina sparta il caliber las opiniuns mez e mez

La proposta da l'uniun da chatschaders da Versomi per la liberaziun dal caliber 7 mm per la chatscha grischuna, ha procurà per ina discussiun pli furiusa e per entginas scurlattadas da chau. Il president da l’uniun Tarzisius Caviezel ha argumentà la refusa da la suprastanza cun quai - che la revisiun da la lescha na vegnia betg aifer ils proxim trais enfin tschintg onns. E liberar il caliber muntassia pervi dal rearmament in burdi finanzial per quellas e quels che sajettan cun il caliber admess da 10.3 mm.

Ils proponents da la dumonda han manegià ch’i duess esser liber d’eleger il caliber. Quai cun resguardar il tir cun la muniziun adattada. Cun 89 encunter 89 vuschs ha il president gì la vusch da tagl, tge che ha manà tar la refusa da la dumonda ed alura anc ina giada a la discussiun, sch’ins veglia repeter la votaziun. Sin il davos han ils proponents per liberar il caliber da 7 mm definitivamain fatg naufragi pervi dal pli da vuschs da quella votaziun.

Regulaziun dal luf: Chatschaders dastgan sajettar pli savens

Sper las persunas envidadas che han tegnì in pled, han  Urban Maissen, il manader da l’Uffizi da guaud e privels da natira, sco era Arno Puorger, il responsabel per animals da rapina tar l’Uffizi da chatscha, fatg in referat. Tenor l'informaziun d'Arno Puorger involva il chantun Grischun pli fitg chatschaduras e chatschadurs en la regulaziun dal luf tar la chatscha 2025. Els ed ellas survegnan dapli dretgs. A chaschun da la radunanza ha Arno Puorger declerà, tge che quai munta concret.

L’onn passà avevan chatschaders e chatschadras be dastgà gidar da regular lufs singuls u entirs trieps. Tar trieps, nua che be ina part dals lufs giuvens pudeva vegnir regulada, fascheva il chantun quai sulet, senza il sustegn da chatschaders e chatschadras. Tut en tut èn 48 lufs vegnids regulads l’atun passà. 4 da quels entras chatschaders e chatschadras.

Precis quants lufs, lufs giuvens u entirs trieps che pon vegnir regulads l'atun che vegn n'è anc betg cler. Quai dependa per l'ina dals stgarps e per l'autra dal svilup dals trieps durant la stad.

Tge din ils e las chatschadras da la surdina?

Dapi l’emprim da favrer 2025 pon las chatschadras ed ils chatschaders duvrar surdinas durant la chatscha grischuna, ed insumma en Svizra. Ina surdina procura per main canera e reducescha il cuntraculp. RTR ha dumandà a la radunanza da delegads las opiniuns davart quest nov med da chatscha che fa endament ils films da spiuns. Ils resuns èn maschadads: «Jau n'hai betg gronda opiniun tar quai», di in chatschader. In auter manegia: «Jau na vegn mai a cumprar ina.»

Bleras chatschadras e blers chatschaders spetgan anc cun cumprar ina surdina. Els vulan observar, co che la situaziun sa sviluppa. Ils vendiders d'armas ch'èn stads preschents sonda, rapportan però d'ina gronda dumonda. I vegnia cumprà ed i dettia dapi l’entschatta da quels fanatichers che sajan da la partida. Ma era glieud che veglia savair, tge ch’ina surdina saja, vegnia en stizun, di il fravi d’armas da Trun, Andri Tomaschett.