Per in territori da skis è in tal eveniment gist durant ils dis tranter Nadal e Bumaun in scenari che dettia da ponderar. I saja er in schoc cura ch'ina lavina vegnia a val sur ina pista ora. Uschia Rainer Flaig, il manader da l'Arena da skis Andermattt/Sedrun.
Nus stuain ponderar tge che nus avain fatg fauss respectiv tge che nus pudain far meglier. [...] Nus pudain ans meglierar, quai na sclaud jau betg.
Er sch'el sa fidia cumplettamain dal persunal ch'è responsabla per la segirezza en il territori, stoppian ins uss natiralmain ponderar tge che saja capità, tge ch'ins haja fatg fauss e tge ch'ins avess stuì far meglier. Uschia il manader da l'Arena da skis Andermatt/Sedrun Rainer Flaig. La finala sajan tuts vegnì a mitsch cun in egl blau.
Pista pir averta il di da la lavina
Ad interim resta la pista pertutgada serrada. Quella vegnia examinada danovamain, ha Flaig sincerà envers RTR. Ins veglia sclerir tge effects climaticas, topografics u fisicals ch'hajan manà a la lavina.
Da ponderar dat er che la pista pertutgada saja pir vegnida averta quel di che la lavina è vegnida a val. La raschun saja che quella pista na vegnia betg ennavada ed ins haja stuì spetgar sin la naiv natirala dals ultims dis.
Lavina da naiv che glischna
Uschenumnadas lavinas da naiv che glischna – per tudestg «Gleitschneelawine» – dettia cura ch'il terren haja ina auta temperatura. Quel onn saja haja dà naiv sin terren chaud, declera il capo per la segirtad da las pistas Carlo Danioth ad RTR. La naiv isoleschia la chalira e lura dettia lavinas da naiv che glischna. Da calcular talas lavinas saja fitg grev, concluda Danioth.
La polizia n'ha anc betg terminà las retschertgas. I n'è anc betg cler sch'ins avess pudì evitar che persunas èn vegnidas sepulidas da la lavina.
RTR actualitad 07:00