La Casa sogn Giusep a Cumpadials – ina chasa d’attempads e da tgira – è stada confundatura da la Rait da sanadad Surselva. Sia finamira era da sa participar cun ses manaschi operativ a quest construct nov cun plirs manaschis dal provediment da tgira e medicinal da la regiun.
Enturn in onn avant la partenza da la rait ha il cussegl da la Fundaziun Casa sogn Giusep dentant decidì da desister da quest pass il mument. «Nus avain vulì communitgar nossa decisiun ad uras als responsabels da la Rait da sanadad Surselva», di Lucas Tuor. El è commember dal cussegl da fundaziun e da la cumissiun chasa.
Betg il dretg mument
Il motiv principal che la Casa sogn Giusep na fa ussa tuttina betg quest pass è la structura nova ed adattada en il manaschi a Cumpadials. «Nus avevan in'organisaziun cun in team da direcziun. Quella structura avain nus midà, respectivamain adattà. Dapi enturn dus onns avain nus ina maina-chasa en la persuna da Ruth Camenisch e menadras da partiziun», di Lucas Tuor.
Quell'adattaziun cun structuras da cader saja sa cumprovada e saja succedida independentamain da la dumonda da sa participar a la Rait da sanadad Surselva u betg. «Sin fundament dal svilup positiv entaifer la chasa è il cussegl da fundaziun sa decidì da desister il mument da la participaziun da la rait. Nus vulain stabilir il manaschi sco el è ussa. Per quest motiv essan nus da l'avis ch'i saja memia baud da far quest pass, restain dentant acziunaris da quella», declera Lucas Tuor.
«Sin fundament dal svilup positiv entaifer la chasa è il cussegl da fundaziun sa decidì da desister il mument da la participaziun da la rait.»
Partenza il 1. da schaner 2027
La partenza da la Rait da sanadad Surselva il 1. da schaner 2027 è definitiva. Quai di il president da la rait, Manfred Manser, sin dumonda da la FMR. «Tuttas instituziuns ch'èn stadas da la partida fin ussa sa participeschan definitivamain», di Manfred Manser. L'excepziun saja la Casa sogn Giusep che haja communitgà quai dacurt. «Nus partin anc adina dal fatg che tuttas autras instituziuns da sanadad ch'èn acziunaris vegnan a transferir lur manaschis operativs en la Rait da sanadad Surselva cun l'emprim da schaner 2027», di Manfred Manser (guarda era box).
Cun las preparativas sajan ils responsabels en il plan. Per las vischnancas è la participaziun al chapital d'aczias da la rait voluntaria. «Las bleras vischnancas èn participadas vid il chapital d'aczias cun il motiv ch'ellas vulan vegnir infurmadas directamain e ch'ellas pon sa participar a la radunanza generala», menziuna Manfred Manser. La Rait da sanadad Surselva duai esser en l'avegnir la societad gestiunaria da las instituziuns participadas vid ella.