La Rait da sanadad Surselva surpiglia a partir dals 01-01-2027 l'organisaziun operativa da las instituziuns dal provediment da sanadad en Surselva. A chaschun d'ina infurmaziun han ils responsabels infurmà vischnancas ed instituziuns.
Reuniun da las instituziuns da sanadad
Per far quai surpiglia la Rait da sanadad Surselva l'inventari ed il persunal da las instituziuns existentas, entant che las immobiglias restan en possess da las instituziuns. L'administraziun da la nova organisaziun vegn centralisada a Glion. Quest construct da surprender tut ils collavuraturs e las collavuraturas administrativas en la nova organisaziun tschenta en dumonda la finamira da far respargns.
Quai po esser l'emprim temp uschia. Da l'autra vart è quai dentant in process en il qual nus vulain evaluar las sinergias, uschia che nus pudain era far respargns ch'ins senta lura era.
Finamiras e sfidas
Entaifer tschintg onns duain tut las instituziuns dil sectur da sanadad vegnir integradas en la rait da sanadad per realisar spargns.
Nossa finamira è che tut las instituziuns da sanadad en integradas en la rait. Era quellas instituziuns che na participeschan anc betg alla rait san far quai pli tard. Naturalmain ston ellas alura sa participar als cust enfin ussa.
Tar las chasas da vegls ed attempads èsi planisà che i dat anc manaders da lieu, entant che la direcziun strategica vegn definida da la Rait da Sanadad. La repartiziun exacta da cumpetenzas e responsabladads è anc en clerificaziun.
Encletga e critica
Il model da locaziun per las chasas da vegls è tenor Manfred Manser vegnì recepida positivamain entras las instituziuns, entant che las tractativas cun l'ospital èn anc en curs e vegnan elavuradas enfin mez da l'auter onn. Critica datti pervia che la reorganisaziun haja lieu mo al nivel operativ e ch'ella creeschia ulteriura cumplexitad.
Cun crear datti ussa anc ina ulteriura organisaziun el sectur da sanadad perquai che tut las instituziuns actualas restan en funcziun. Quai n'è betg il senn da la chaussa.
Enfin la mesadad da l'auter onn ston las dumondas avertas vegnir scleridas per che las instituziuns possian decider definitivamain davart lur participaziun.
