Siglir tar il cuntegn

Header

cuntegn

Vischnanca Ilanz/Glion Rait da sanadad Surselva dat da discutar

La participaziun a la «Reit da sanadad Surselva SA» n'è en principi betg dispitaivla. Ma betg avair insatgi da la vischnanca en il cussegl administrativ da quella SA procura per indignaziun tar suprastanza e parlament.

Il president communal, Marcus Beer, ha infurmà il parlament davart la decisiun da la suprastanza da sa participar a la fundaziun da la Reit da sanadad Surselva SA . Quella duess en il futur ameglierar la collavuraziun en il sectur da sanadad en Surselva. Avantatgs fissan ch'ins pudess crear in consorzi da collavuraturs e collavuraturas, da structurar l'informatica communablamain sco era da spargnar tar l'acquisiziun. Il parlament ha discutà davart il senn da sa participar. I ha dà vuschs scepticas cura ch'i gieva par il tema da spargnar, i pudess esser uschia sco tar fusiuns politicas, la fin custia dapli.

Nagin sez el cussegl administrativ da la Rait da sanadad Surselva

Fermamain crititgà ha il parlament sco era il president communal il fatg che la suprastanta Caroline Gasser Curschellas n'è betg vegnida elegida dals delegads da la Sana Surselva sco commembra en il cussegl administrativ da la nova societad.

audio
Nagin sez en cussegl da la Rait da sanadad
ord Actualitad dals 14.09.2023. Maletg: RTR
laschar ir. Durada: 4 minutas 4 Secundas.

Ins veglia anc ina giada discutar cun ils purtaders da la Sana Surselva davart il fatg che Glion n'è betg en il cussegl administrativ da la Reit da Sanadad Surselva SA. Plinavant sto la suprastanza anc ina giada decider davart la participaziun a la societad, cunquai che Laax, Schluein e Medel (Lucmagn) na sa participeschian betg a la Rait da sanadad Surselva SA e la clav da repartiziun sa mida.

Contribuziun da la vischnanca per ospital regiunal augmenta

L'Ospital regiunal Surselva ha l'onn varga fatg ina perdita da 1,4 milliuns francs. Quai or da motivs structurals, sco Marcus Beer ha declerà. Ils puncts da taxa per ils cas ambulants sajan memia bass per cuvrir ils custs effectivs, uschia che la vischnanca sto gidar sut la bratscha cun ina contribuziun annuala pli auta, vul gir, cun var 1,3 milliuns francs enstagl da radund 600'000 francs.

Ina vusch tar la revisiun da la constituziun

Suenter ch'il suveran da Glion aveva ils 18 da zercladur 2023 ditg Gea a l'iniziativa per ina revisiun totala da la constituziun communala, ha la suprastanza gì l'incumbensa da preparar ils proxims pass per questa lavur. Uschia ha ella definì ensemen cun il comité dals iniziants la procedura d'installar ina cumissiun da 10 persunas per la revisiun da la constituziun. La cumissiun duai sa cumponer da trais persunas dal comité d'iniziativa, duas parlamentarias u parlamentaris e tschintg votantas u votants.

Il parlament ha ier saira gì da votar sch'el vul insumma occupar ils dus sez en la cumissiun. Quai ha el fatg cun eleger unanimamain Gian Marco Bianchi e Bruno Caderas sco candidats per la cumissiun. L'iniziativa aveva tranter auter la finamira da reducir il dumber da parlamentarias e parlamentaris, u d'introducir la radunanza communala.

Forsa datti tuttina ina festa da 10 onns fusiuns

Cun l'incumbensa Capaul pertutgant la festa da giubileum 10 onns fusiun da la vischnanca, ha il parlament anc ina giada decidì da elavurar in concept per ina festa cun in budget pli modest che la proposta che la suprastanza ed ina gruppa da lavur avevan fatg en la sesida dals 12 d'avrigl 2023. L'idea èsi da preschentar quel tar la proxima sesida dal parlament. Il budget na duess betg surpassar la summa da 80'000 enfin 100'000 francs.

Plinavant ha il parlament elegì la nova suprastanta, Michal Hohl, sco delegada da la Spitex. Per il post vacant en il cussegl scola ha il parlament elegì Julian Bertogg. Ultra da quai ha il parlament decidì davart las incumbensas da la sessiun da giuventetgna Glion 2023.

RTR novitads 06:00

Artitgels legids il pli savens